लमजुङ । लमजुङमा मालपोत प्रमुख नटिक्दा सेवाग्राहीहरु समस्यामा परेका छन् । लामो समयदेखि मालपोत प्रमूख नहुँदा लमजुङका सेवाग्राहीहरु समस्यामा परेका हुन् । प्रमूख नहुँदा दैनिक सेवाप्रवाह प्रभावित भएको छ ।
मालपोत कार्यालयमा एकवर्ष देखिनै पटक पटक कार्यालय प्रमूख फेरिदैं आउनुभएको छ । पछिल्लो एक वर्षमा मात्रै जिल्ला मालपोत कार्यालयमा तीन जना प्रमूखको आगमन तथा सरुवा भएको छ । कार्यालयमा प्रमूख एक महिना भन्दा बढि नबस्दा सेवाग्राहीहरु समस्यामा परेका छन् ।
गत आर्थिक वर्षको फागुन अघिसम्म निमित्त कार्यालय प्रमूखको भरमा सेवा प्रवाह हुँदै आएको थियो । फागुनमा प्रमुखका रुपमा चिरिञ्जीवी पौडेल आउनुभएपनि एक महिनामै सरुवा हुनुभयो । त्यसपछि जेठसम्म निमित्तको भरमा कार्यालय सञ्चालन गरियो । जेठ महिनामा हरेन्द्र कुमार श्रेष्ठ आउनुभयो तर, असार महिनामै सरुवा हुनुभयो । त्यसयता चार महिना निमित्तको भरमा सेवा प्रवाह हुँदै आएको थियो ।
पछिल्लो पटक मंसिरमा भिष्म कुमार मल्ल कार्यालय प्रमूख भएर आउनुभयो र उहाँपनि पुस महिनामै सरुवा हुनुभयो । त्यसयता कार्यालय प्रमुख आउनुभएको छैन् । प्रमूखका रुपमा कास्कीबाट रामचन्द्र अधिकारीलाई सरुवा गरिएपनि उहाँ लमजुङमा हाँजिर हुन आउनुभएको छैन् ।
हाल निमित्त कार्यालय प्रमूखको रुपमा कार्यालयका कर्मचारी पुर्ण बहादुर गुरुङलाई जिम्मेबारी दिइएको छ । तर, उहाँलाई कार्यालय प्रमूखको अख्तियारी नहुँदा सेवा प्रवाह प्रभावित भएको छ । अख्तियारी नपाएका निमित्तका भरमा कार्यालय सञ्चालन हुँदा महत्वपुर्ण कामहरु रोकिएको बेसीसहर–३ का भरतबाबु घिमिरेले बताउनुभयो ।
प्रमुख नहुँदा कार्यालयबाट निर्णय गर्नुपर्ने काम, नामसारी, घरजग्गा कायम, संशोधनलगायतका काम रोकिएको मालपोत कार्यालय निमित्त प्रमुख पुर्णबहादुर गुरुङले बताउनुभयो । सामान्य सेवा प्रवाह भईरहेको भएपनि कार्यालयमा विशेष काम लिएर टाढा–टाढावाट आएका सेवाग्राही प्रमुख नहुँदा त्यतिकै फर्कनु परेको छ ।
मन्त्रालयवाट मालपोत कार्यालय लमजुङ सरुवा भएर आउने अधिकांश कार्यालय प्रमुख आफ्नो सरुवा हुने अवधि नपुुग्दै सरुवा मागेर हिँड्ने गर्नुभएको छ । पूरै अवधिसम्म प्रमुखहरु नबस्नुमा एकातिर स्थानीय पुराना कर्मचारीको हालीमुहाली र कमाइ कम हुनु रहेको हुनसक्ने सेवाग्राहीले आंशङ्का गरेका छन् ।
