लमजुङ । लमजुङको मस्र्याङ्दी गाउँपालिकाको प्रशासकीय भवन निर्माण सम्पन्न भएको छ । शिलान्यास भएको १८ महिनामै भवन निर्माण सकिएको हो ।
नवनिर्मित भवनमा यही माघ १९ गते सर्ने र २० गते उद्घाटन गर्ने गाउँपालिकाले तयारी गरेको छ । नवनिर्मित गाउँपालिका भवनको नेपाल सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले उद्घाटन गर्ने कार्यक्रम रहेको छ ।
उक्त प्रशासकीय भवनको पहिलो तल्ला अपाङ्गमैत्री रहेको छ भने भवनको संरचनामा नै बेसमेन्ट पार्किङको समेत सुविधा रहेको छ । भवनसँगैको भित्तोलाई सदुपयोग गरेर क्यान्टिन निर्माण गरिएको छ ।
२८ वटा कोठाको तीन तले भवनमा अध्यक्ष र उपाध्यक्षको छुट्टाछुट्टै कार्यकक्ष सहितको सचिवालय कक्ष, न्यायिक समितिको कार्यकक्ष, प्रशासकीय प्रमुखको कार्यकक्ष, पालिका अन्तर्गतका सबै विषयगत शाखाका छुट्टाछुट्टै कार्यकक्ष रहने छ ।
हाल गाउँपालिकाको भवन नहुँदा साविकको भुलभुले गाविस भवनमा गाउँपालिका कार्यालय, पञ्चविचार प्राविमा वडा कार्यालय र केही शाखा कार्यालय रहेका छन् भने केहि शाखाहरु खुदिमा संचालन भईरहेको छ ।
प्रशासकीय भवन निर्माणपछि हाल शाखाहरु छरिएर रहँदा जनताले पाएको सास्ति हटेर सर्वसुलभ तरिकाले सेवा पाउने विश्वास गाउँपालिकाले लिएको पालिका अध्यक्ष अर्जुन गुरुङले बताउनुभयो ।
२०८२ जेठ २३ सम्म निर्माण सम्पन्न गर्नेगरि सम्झौता भएको भवनको २०८१ फागुन १५ गते अध्यक्ष गुरुङले शिलान्यास गरि निर्माण कार्यको प्रारम्भ गर्नुभएको थियो ।
भवन निर्माणको लागि संघीय सरकार स्थानिय पूर्वाधार कार्यालय र मस्र्याङ्दी गाउँपालिकाले ६०÷४० लागत बेहोर्ने गरि भ्याटसहित ५ करोड ९७ लाख ६६ हजार ७ सय ६ रुपैयाँमा भवन निर्माणका लागि सम्झौता गरिएको थियो ।
प्राविधिक र आर्थिक प्रस्तावमा सवै प्रक्रिया पूरा गरेर शैलेन्द्र–जयज्योती–बौद्धनाथ जे.भी.संग २०८० जेठ २३ गते सम्झौता भएको गाउँपालिकाका ईन्जिनियर सुरेश गौतमले जानकारी दिनुभयो । गौतमका अनुसार निर्माण व्यवसायीले २०८२ जेठ २३ गते भित्र भवन बनाइसक्ने गरी सम्झौता भएको थियो । तर, तोकिएको समय अगावै भवन निर्माण गरेर हस्तान्तरण हुन लागेको उहाँले बताउनुभयो । तोकिएको समयभन्दा अगावै निर्माण सम्पन्न भएमा निर्माण कम्पनीलाई पुरस्कृत हुने र कमिशन रकम पाउने ब्यवस्था छ ।
