लमजुङ– गण्डकी प्रदेश सरकारले आगामी आर्थिक वर्षका लागि सार्वजनिक गरेको बजेटअनुसार लमजुङका स्थानीय तहका लागि करिब १७ करोड रकम अनुदान प्राप्त हुने भएको छ । प्रदेश सरकारले शनिबार सार्वजनिक गरेको बजेटअनुसार आर्थिक वर्ष २०८१/०८२ का लागि लमजुङलाई १६ करोड ९५ लाख रुपैयाँ विनियोजन भएको हो ।
प्रदेश सरकारले लमजुङ जिल्लालाई चालु आर्थिक वर्षमा भन्दा आगामी आर्थिक वर्षका लागि एक करोड तीन लाख ८८ हजार रुपैयाँ कम बजेट विनियोजन गरेको छ । चालु आर्थिक वर्ष २०८०/०८१ का लागि लमजुङका आठ स्थानीय तहलाई १७ करोड ९९ लाख रुपैयाँ विनियोजन भएको थियो । प्रदेश सरकारले सार्वजनिक गरेको अन्तरसरकारी वित्तीय हस्तान्तरण विवरणअनुसार जिल्लाका आठ स्थानीय तहमध्ये सदरमुकामसमेत रहेको बेसीसहर नगरपालिकाले सवैभन्दा धेरै दुई करोड ७८ लाख रुपैया बजेट पाउने भएको छ । बेसीसहरले चालु आर्थिक वर्षमा तीन करोड २१ लाख रुपैया बजेट पाएको थियो ।
जिल्लाको सुन्दरबजार नगरपालिकाले आगामी आर्थिक वर्षमा दुई करोड ३७ लाख रुपैयाँ पाउने भएको छ । चालु आर्थिक वर्षमा सुन्दरबजार नगरपालिकाले दुई करोड ४८ लाख रुपैयाँ पाएको थियो । त्यसैगरी जिल्लाको मध्यनेपाल नगरपालिकाले दुई करोड २४ लाख १९ हजार रुपैया पाउने भएको छ । मध्यनेपाल नगरपालिकाले चालु आर्थिक वर्षमा दुई करोड ४९ लाख ९० हजार रुपैयाँ पाएको थियो । जिल्लाका नगरपालिकामध्ये सबैभन्दा कम राईनास नगरपालिले भने आगामी आर्थिक वर्षमा दुई करोड चार लाख रुपैयाँ पाउने भएको छ । चालु आर्थिक वर्षमा राईनासले दुई करोड १४ लाख रुपैयाँ पाएको थियो ।
जिल्लाको गाउँपालिकामध्ये पनि सबैभन्दा धेरै मस्र्याङदी गाउँपालिकाले दुई करोड चार लाख रुपैयाँ पाउने भएको छ । मस्र्याङदीले चालु आर्थिक वर्षमा दुई करोड १४ लाख रुपैयाँ बजेट पाएको थियो । यसैगरी दोर्दी गाउँपालिकाले आगामी आर्थिक वर्षमा दुई करोड एक लाख ४० हजार रुपैयाँ पाउने भएको छ । दोर्दीले चालु आर्थिक वर्षमा दुई करोड एक लाख ९८ हजार रुपैयाँ पाएको थियो ।
जिल्लाको विकटमध्येको दूधपोखरी गाउँपालिकाले भने आगामी आर्थीक वर्षका लागि एक करोड ७४ लाख रुपैयाँ पाउने भएको छ भने सबैभन्दा कम क्व्होलासोँथार गाउँपालिकाले आगामी आर्थिक वर्षमा एक करोड ७१ लाख रुपैयाँ पाउने भएको छ । दूधपोखरीले चालु आर्थिक वर्षमा एक करोड ७५ लाख रुपैयाँ पाएको थियो भने क्व्होलासोँथार गाउँपालिकाले चालु आर्थिक वर्षमा एक करोड ७२ लाख ५८ हजार रुपैयाँ बजेट पाएको थियो ।
चारवटा नगरपालिका र चार गाउँपालिका रहेको लमजुङमा नगरपालिकाका लागि मात्रै नौ करोड ४४ लाख ८३ हजार रुपैयाँ विनियोजन भएको छ भने गाउँपालिकाका लागि मात्रै सात करोड ५० लाख ७८ हजार रुपैयाँ विनियोजन भएको छ । पछिल्ला तीन आर्थिक वर्षमा संघीय सरकार र प्रदेश सरकारबाट जिल्लाका लागि प्राप्त हुने अन्तर सरकारी वित्तीय हस्तान्तरण रकम घट्दो क्रममा रहेको छ । अघिल्लो आर्थिक वर्षमा मात्रै प्रदेश सरकारबाट लमजुङमा १८ करोड १६ लाख ५९ हजार अन्तरसरकारी वित्तीय हस्तान्तरण भएको थियो ।
