लमजुङ– वर्षाको समयमा सम्भावित बाढीको जोखिम न्यूनीकरणका लागि लमजुङका मुख्य नदी तथा खोला करिडोरमा साइरन राख्ने तयारी भएको छ । जिल्ला विपद् व्यवस्थापन समितिले जिल्लाभित्रका ठूला नदी तथा खोला करिडोरमा साइरन व्यवस्थापन गर्ने निर्णय गरेको हो ।
जिल्ला विपद व्यवस्थापन समितिका अध्यक्ष एवं प्रमुख जिल्ला अधिकारी बुद्धबहादुर गुरुङको अध्यक्षतमा सोमबार बसेको बैठकले सो निर्णय गरेको हो । विशेषगरी जिल्लाभित्र मस्र्याङ्दी नदी करिडोर, दोर्दी खोला करिडोर, ङादी खोला करिडोर, रुदी खोला, चेपे खोला मादी खोला, मिदिम खोला करिडोरमा आपतकालीन जानकारीका लागि साइरन राख्ने तयारी भएको हो ।
साइरन राख्नका लागि सम्बन्धित करिडोरमा भएका जलविद्युत आयोजनालाई पानीको बहाव, सम्भावित बाढीपहिरो जोखिम लगायतको विषयमा आमनागरिकलाई पर्याप्त सूचना दिनेगरी अपातकालीन जानकारीका लागि साइरनको व्यवस्था गर्न आग्रह भएको छ । सोबाहेक नदीजन्य विपद् आइपरेमा तत्काल उद्धारका लागि आवश्यक उपकरण एवं सामग्रीको व्यवस्थापन र जनशक्ति तयारी अवस्थामा राख्ने बैठकले निर्णय गरेको छ ।
त्यसैगरी मनसुनजन्य विपद् बाढी पहिरोको क्षति न्यूनीकरणका लागि सूचना सम्प्रेषण गर्ने, उद्धार एवं राहत कार्यलाई शीघ्रता दिन सबै सरोकारवाला जिम्मेवार निकायले सक्रिय भूमिका निर्वाह गर्ने पनि बैठकले निर्णय गरेको छ । बैठकले सोबाहेक बैठकमा स्थानीय तहबाट प्राप्त सुझाव एवं बैठकबाट प्राप्त सुझावको आधारमा मनसुन पूर्वतयारी कार्ययोजना २०८१ स्वीकृत गर्ने निर्णय भएको छ । बैठकले आर्थिक वर्ष २०८१/०८२ का लागि पेस हुन आएको जिल्ला विपद् पूर्वतयारी तथा प्रतिकार्य योजनालाई परिमार्जनसहित स्वीकृत गर्ने पनि निर्णय गरेको छ ।
जिल्ला विपद् व्यवस्थापन प्रतिवेदन तयार गर्नका लागि सबै स्थानीय तहले आगामी असार २० गतेभित्र स्थानीय विपद् व्यवस्थापन प्रतिवेदन तयार गरी जिल्ला प्रशासन कार्यालयलाई उपलब्ध गराउन पनि निर्णयसहित आग्रह गरेको छ । बैठकले जिल्लाका स्थानीय तह र अन्य सरोकारवालाको सिफारिस समेतका आधारमा विपद्मा परेका घर परिवारलाई उपलब्ध गराइएको ९७ हजार रुपैयाँ राहत रकम अनुमोदन गरेको छ ।
सोबाहेक चालु आर्थिक वर्षमा विपद् व्यवस्थापनमा प्रयोग गरिएको राहत वितरणसम्बन्धी प्रतिवेदन साथै उद्दार कार्यको विवरणसमेत सबै स्थानीय तहले मिति आगामी असार २० गतेभित्र जिल्ला प्रशासन कार्यालयलाई उपलब्ध गराउने निर्णय गरेको छ । सोही बैठकले जिल्ला विपद् पूर्वतयारी तथा प्रतिकार्य योजना २०८१/०८२ प्रकाशन गर्नका लागि ग्रामीण सामुदायिक विकास केन्द्र (आरसीडीसी) लाई अनुरोध गर्ने निर्णय गरेको छ ।
वर्षाको समयमा जिल्लास्थित उदीपुर पहिरो, खरखरे पहिरो, गाइखुरे झरनाको कारण डुम्रे बेसीसहर चामे सडक अवरुद्ध हुनसक्ने अवस्थामा मस्र्याङ्दी पारिको वैकल्पिक बाटो प्रयोग गर्ने र त्यसका लागि सडक तयारी अवस्थामा राख्न पूर्वाधार विकास कार्यालय लमजुङ र डुम्रे बेसीसहर चामे सडक योजनालाई आवश्यक तयारी गर्न आग्रह गरेको छ । बैठकमा जिल्लास्थित सुरक्षा निकाय प्रमुख, विभिन्न कार्यालय प्रमुख एवं सरोकारवाला निकायका प्रमुख एवं प्रतिनिधिको उपस्थिति रहेको थियो ।
नदी कटानको जोखिममा रहेका बस्ती संरक्षणका लागि तटबन्धन गर्न पहल
जिल्ला विपद् व्यवस्थापन समितिले लमजुङका मुख्य नदी र खोलाको कटानबाट जोखिममा रहेका बस्ती संरक्षणका लागि तटबन्धन गर्न प्रदेश सरकार र संघीय सरकारसँग अनुरोध गर्ने भएको छ । जिल्लास्थित विपद् व्यवस्थापन समितिको बैठकले जिल्लाका विभिन्न स्थानीय तहअन्तर्गत रहेका मुख्य नदी तथा खोलाको कटानबाट जोखिममा परेका बस्ती संरक्षणका लागि माथिल्लो निकायमा अनुरोध गर्ने निर्णय गरेको हो ।
बैठकले बेसीसहर नगरपालिका, राइनास नगरापालिका, दोर्दी गाउँपालिका, मस्र्याङदी गाउँपालिका, क्व्होलासोँथार गाउँपालिका र दूधपोखरी गाउँपालिका अन्तर्गतका नदी तथा खोलामा जोखिममा परेका बस्ती संरक्षणका लागि प्रदेश तथा संघ सरकारसँग अनुरोध गर्ने निर्णय गरेको हो । बैठकले बेसीसहर नगरपालिका अन्तर्गत मजुवा खोलाको शीतल पाटीदेखि पुलसम्मको भाग, पुमा खोला र खहरे खोलाको जोखिम क्षेत्रमा कटानबाट जोखिममा परेका बस्ती संरक्षणका लागि तटबन्धन गर्न सिफारिस गर्ने निर्णय गरेको छ ।
त्यसैगरी राइनास नगरपालिका अन्तर्गत चपेखोला र स्याउली बजार बस्ती संरक्षणका लागि तटबन्धन सिफारिस गर्ने निर्णय भएको छ । त्यस्तै दोर्दी गाउँपालिका अन्तर्गत किसेदी खोला नदी किनारका ठाउँ, दोर्दी खोला नदी किनारका ठाउँ र छाङ्दी खोला नदि किनारका ठाउँमा जोखिममा परेका बस्ती संरक्षणका लागि तटबन्धन गर्न सिफारिस गर्ने निर्णय गरेको छ । सोबाहेक मस्र्याङ्दी गाउँपालिका अन्तर्गत भुलभुले, रामबजार, खुदी, स्यांगे र अर्खले बस्ती संरक्षणका लागि तटबन्धन गर्न सिफारिस गर्ने निर्णय भएको छ ।
त्यसैगरी क्व्होलासोँथार गाउँपालिका अन्तर्गत मिदिम करिडोरका घाम्राङबेसी, धिचे, काम्दु र रुदी कोरीडोरको बगैचा बस्ती संरक्षणका लागि तटबन्धन गर्न सिफारिस गर्ने निर्णय भएको छ । सोबाहेक दूधपोखरी गाउँपालिका अन्तर्गत कुनाघाट, घरालबेसी कुईले, बन्सारवेसी र कल्तुङवेसी बस्ती संरक्षणका लागि तटबन्धन गर्न सिफारिस गर्ने निर्णय भएको छ ।
