लमजुङ– लमजुङको राइनास नगरपालिकाबाट दुई सय मेट्रिक टन आलु बिक्री भएको छ । निर्वाहमुखी खेती किसानी गर्दै आएका राइनासका कृषकहरुले चालु आर्थिक वर्षबाट व्यावसायिक आलुखेती गरी पहिलो वर्षमै दुई सय मेट्रिक टन बढी आलु बिक्री गरेका हुन् ।
गण्डकी प्रदेश सरकारले कृषि ज्ञान केन्द्र लमजुङमार्फत कृषकहरुलाई व्यावसायिक आलुखेतीका लागि उत्पादनमा आधारित अनुदानसहित प्रोत्साहन गरेको छ । व्यावसायिक आलुखेतीका लागि प्रवर्द्धनात्मक कार्यक्रम आएसँगै स्थानीय कृषकहरुले पाँच सय रोपनी जमिनमा व्यावसायिक रूपमा आलुखेती गरेका हुन् । कृषकहरुले उत्पादन गरेको आलु घरायसी प्रायोजनका लागि आवश्यक मात्रामा राखेर दुई सय मेट्रिक टन बिक्री गरेको कृषि ज्ञान केन्द्र लमजुङका प्रमुख सुदिप खतिवडाले बताए ।
आलुको बजार सुनिश्चित गर्नको लागि आलु उत्पादन गर्नु पूर्व नै किसान र व्यावसायिक कम्पनीबीच सम्झौता भएको थियो । सम्झौता बमोजिम भैरहवास्थित आलु चिप्स उत्पादन गर्ने कम्पनी फस्ट च्वाइस फुड प्रालिले जिल्लामा उत्पादित आलु खरिद गरेको खतिवडाले बताए । प्रदेश सरकारले समुदायस्तरमा प्रविधियुक्त कृषि उत्पादन प्रवर्द्धन कार्यक्रमअन्तर्गत यो वर्ष राइनाससहित जिल्लाको विभिन्न स्थानीय तहमा आलु खेती कार्यक्रम सञ्चालन गरेको छ ।
व्यावसायिक आलुखेतीका लागि कृषि ज्ञान केन्द्र लमजुङमार्फत जिल्लाको राइनास नगरपालिकाको ३, ४ र ६, मध्यनेपाल नगरपालिकाको ४ र १०, सुन्दर बजार नगरपालिकाको–१० अन्तर्गत आठ वटा कृषक समूहसँग सम्झौता भएको थियो । हाल राइनासमा उत्पादित आलु बिक्री भइसकेको र अव मध्यनेपाल र सुन्दर बजारमा उत्पादित आलु बिक्रीको चरणमा रहेको ज्ञान केन्द्र प्रमुख खतिवडाले बताए । ज्ञान केन्द्रले कृषकहरुका लागि आलुको बिउ व्यवस्थापनदेखि बजार व्यवस्थापनसम्मको सहयोग गरेको कार्यालय प्रमुख खतिवडाको भनाइ छ ।
जिल्लामा हिउँदे आलु उत्पादन कार्यक्रमका लागि एक करोड ४० लाख रुपैयाँ बजेट विनियोजन भएको केन्द्रले जनाएको छ । केन्द्रले बिउ खरिद र यन्त्र उपकरणको लागि ७५ प्रतिशत, सिँचाइ पूर्वाधार र बजारीकरणको लागि ८५ प्रतिशत र ढुवानीको लागि ५० प्रतिशत सहयोग गरेको जनाएको छ । यसैगरी प्राविधिक सेवा, विषादी, तालिम, अनुगमन, बाली बीमालगायतमा निःशुल्क सेवा उपलब्ध गराएको पनि कार्यालयले जनाएको छ ।
