लमजुङ । भेटेरिनरी अस्पताल तथा पशु सेवा विज्ञ केन्द्र लमजुङले आ.ब. २०७९÷०८० मा ७४.२५ प्रतिशत वित्तिय प्रगति हासिल गरेको छ । संघ र प्रदेशसमेतको गरी ६ करोड १२ लाख ९ हजार ६ सय रूपैयाँको बजेट प्राप्त गरेकोमा वित्तीय प्रगति ७४.२५ प्रतिशत हासिल गरेको केन्द्रका प्रमुख वरिष्ठ पशु चिकित्सक डा. रुपेश श्रेष्ठले जानकारी दिए ।
पशु व्यवसाय प्रवद्र्धनका लागि अनुदान सहयोग, पशु स्वास्थ्य प्रवद्र्धन, उपचार तथा रोग नियन्त्रण, क्षमता विकास तथा सचेतना र पुँजीगत क्षेत्रमा काम भएको श्रेष्ठले बताए ।
लमजुङ जिल्लामा बंगुरमा फैलिएको अफ्रिकन स्वाइन फिवर र गाइ गोरूमा फैलिएको लम्पी स्किन रोगका कारण किसानहरूले ठूलो क्षति ब्यहोर्नु परेको उनले बताए । उनले बेसीशहर नगरपालिका, सुन्दरबजार नगरपालिका र मस्र्याङदी गाउँपालिकाका १६ वटा फार्ममा अफ्रिकन स्वाइन फिवरको प्रकोप देखिएको र यस रोगबाट ७ सय ८२ वटा बंगुर मरेका बताए । यस रोग नियन्त्रणका लागि खासै कुनै औषधी नहुने भएकाले नियन्त्रणका लागि बंगर तथा सुंगुर ओसार पसारमा रोक लगाइएको उनले बताए ।
वरीष्ठ पशु चिकित्सक डा. श्रेष्ठले लमजुङ जिल्लामा यो वर्ष २०८० वैशाख महिनामा पहिलो पटक लम्पी स्किन रोगको प्रकोप फैलिएको र जिल्लाका सबै ८ पालिकामा रोग फैलिएको जानकारी दिए । उनले हालसम्म १ हजार ८ सय २ वटा पशु यस रोगबाट संक्रमित भएका र ८५ वटा पशु (गाइ गोरू)को मृत्यु भएको बताए ।
मध्यनेपाल नगरपालिका र दोर्दी गाउँपालिकामा सबै भन्दा धेरै संक्रमण रहेको जानकारी दिँदै श्रेष्ठले रोग नियन्त्रणका लागि ८ वटै स्थानीय तहमा खोप कार्य जारी रहेको र हालसम्म करिब ८ हजार ५ सय भन्दाबढी पशुलाई खोप लगाईएको जानकारी दिए ।
यस बर्ष लमजुङका १३ हजार ६५० घरधुरीका १ लाख ४५ हजार १६७ पशुमा भ्याक्सिन लगाइएको उनले जानकारी दिए ।
