लमजुङ । बेंसीसहर नगरपालिका वडा नं. १० का बासिन्दाले भाचोक खोलामा काठको पूल निर्माण गरेका छन् ।
असारको पहिलो साता आएको बाढीले पूल बगाएपछि यातायात सम्पर्क विच्छेद भएको थियो । बर्षातका बेला खोलामा पुल नभएपछि स्थानीय बासीन्दा जोखिम मोलेर खोलो तर्न बाध्य थिए भने यातायातका साधान चल्न सकेका थिएनन् ।
पूल नहुँदा वडा नंं १० मा पर्ने खासुर, खासुरबेसी, देउजनथोक, पांग्रेक्यू, खाँचे, कुप्लिङ, गाउँ भाचोक, सिरूवारी, भाचोकबेसी लगायतका स्थानका स्थानीय समस्यामा परेका थिए ।
स्थानीयले करिब एक महिनाको प्रयासमा काठको पूल निर्माण गरेपछि अहिले आवत जावतमा सहज भएको छ । वडा कार्यालयको संयोजनमा स्थानीयले भाचोक खोलामा अस्थायी काठे पुल निर्माण गरेका हुन् ।
स्थानीय बासीन्दाले श्रमदान र चन्दा संकलन गरी पुल निर्माण गरेका हुन् । उनीहरूको प्रयासमा वडा कार्यालय, बेसीशहर नगरपालिका, नेपाल प्रहरी, सशस्त्र प्रहरी, डुम्रे बेसीशहर चामे सडक योजनासमेतको सहयोग रहेको नेकपा एमाले गण्डकी प्रदेश कमिटी सदस्य एवं स्थानीय दूधप्रसाद घलेले जानकारी दिए ।
जिल्ला प्रशासन कार्यालयसंगको समन्वयमा सशस्त्र प्रहरी, जनपद प्रहरी र नेपाली सेनाले समेत काठेपुल निर्माणका लागि श्रमदान गरेका थिए । डुम्रे बेसीशहर चामे सडकले पुल निर्माणका क्रममा एक्साभेटर पठाएर सहयोग गरेको थियो ।
बेसीशहर नगरपालिकाले बिपद कोषबाट पुलको जग बनाउन आवश्यक रड, सिमेण्ट र एक्साभेटरका लागि चाहिने इन्धनमा सहयोग गरेको थियो । वडा नं. १० का विभिन्न गाउँका स्थानीयले श्रमदान गरेका थिए । पुलका लागि चाहिने काठ वन कार्यालयसँगको समन्वयमा गाउँकै सामुदायिक वनले उपलव्ध गराएको वडा नं. १० का वडाध्यक्ष गंगाबहादुर थापाले बताए ।
भाचोक खोला डुम्रे बेसीशहर चामे सडकको बैकल्पिक मार्ग पनि हो । बेसीशहर ६ मा पर्ने खरखरे भीरमा पहिरो जाँदा बेसीशहरबाट बाँझाखेत, भाचोकबेसी, लेतेफाँट, माथिल्लो मस्र्याङ्दीको पावर हाउस हुँदै सुरूङमार्गमा यो सडक जोडिन्छ ।
तस्विर : दुधप्रसाद घले ।
