मर्स्याङ्दी गाउँपालिकाका अध्यक्ष अर्जुन गुरुङले किसानहरुलाई उत्पादन बढाउन आग्रह गरेका छन् । बुधबार मर्स्याङ्दी बहुउदेश्यीय कृषि सहकारीको आयोजनामा भएको उत्पादन बृद्धि तथा बजारीकरण विषयक कार्यक्रममा बोल्दै अध्यक्ष गुरुङले उत्पादन बढाउन किसानलाई सहयोग गर्न गाउँपालिका तयार रहेको बताए ।
‘यतिबेला भारतीय उत्पादनको तरकारी हाम्रो बजारमा आउँदा किसानहरु समस्यामा परेका छन् । भारतबाट तरकारी आयत रोक्ने काम संघीय सरकारको हो’, अध्यक्ष गुरुङले भने, ‘बाहिरबाट आउने तरकारी विस्थापित गर्नेगरी यही उत्पादन बढाउनुहोस, हामी हातेमालो गर्न तयार छौं ।’
किसानको उत्पादन विक्री गर्न कृषि सहकारी स्थापना गरिएकाले सबै किसानले यही ल्याएर विक्री गर्न आग्रह गरे । सहकारी मार्फत बजारको खोजी गरी विक्री गरिने र विक्री नै हुन नसके उत्पादन लागत मुल्य गाउँपालिकाले दिन तयार रहेको उनले बताए ।
सबै किसानले अनुदान पाउने गरी उत्पादनमा आधारित अनुदानको ब्यवस्था गर्न लागिएको उनले बताए । ‘उत्पादन बृद्धि गर्न दुध र तरकारीमा उत्पादनमा आधारित अनुदान दिने गरी एउटा मोडल तयार गर्दै छौं’, उनले भने, ‘मापदण्ड बनाएर किसान सुरक्षा भत्ताको ब्यवस्था गर्छौं ।’
एक वडा एक कृषि प्राविधिकको ब्यवस्था गरिएकाले प्राविधिकहरुलाई किसानको गोठ तथा बारीमा पुगेर सेवा दिन उनले आग्रह गरे । प्राविधिक किसानको गोठ तथा बारीमा नपुगे कारबाही गरिने उनले बताए ।
पूर्व उपाध्यक्ष होमबहादुर विकले कृषि उत्पादन बढाउन किसानलाई प्राविधिक र अनुदान सहयोगलाई प्रभावकारी बनाउनुपर्ने बताए । वडा नं. ८ का अध्यक्ष धनसिं तामाङ, साना किसान कृषि सहकारीका अध्यक्ष हिरादेवी घले, किसान सञ्जालका अध्यक्ष भिष्मकान्त कुईकेलले कृषि उत्पादन बृद्धी गर्दै बजारीकरणमा जोड दिन आग्रह गरे ।
सहकारीका अध्यक्ष नवीनराज कुइँकेलको अध्यक्षतामा भएको कार्यक्रममा सहभागी किसानहरुले आफुँहरु उत्पादन गर्न तयार रहेपनि बजारको समस्या भएको गुनासो गरेका थिए । उनीहरुले बजारसँगै प्राविधिक सहयोग र तालिमको आवश्यकता रहेको बताए ।
कार्यक्रममा गाउँपालिका उपाध्यक्ष जुनामाया थापा, वडा नं. ३ का अध्यक्ष दुधमान तामाङ, वडा नं. ७ का अध्यक्ष तिलबहादुर गुरुङ, कृषि शाखा प्रमुख तिलक कट्टेल, पशु शाखा प्रमुख जीवनमाया वली, उद्योग बाणिज्य संघ खुदी इकाईका अध्यक्ष सूर्यप्रकाश कतिलालगायत सबै वडाका ब्यवसायिक किसानहरुको उपस्थिति थियो । सहकारीका सचिव ऋषिराम बस्नेतले सञ्चालन गरेको कार्यक्रममा उपाध्यक्ष यामलाल तामाङले स्वागत मन्तब्य राखेका थिए ।
