लमजुङको मर्स्याङ्दी गाउँपालिकालाई पूर्ण खोप सुनिश्चितता तथा दिगोपना घोषणा गरिएको छ । निश्चित सुचकहरु पूरा गरेको आधारमा मंगलबार एक कार्यक्रमविच मर्स्याङ्दी गाउँपालिकालाई पूर्ण खोप सुनिश्चितता तथा दिगोपना घोषणा गरिएको हो ।
‘स्थानीय श्रोतको उपयोग, स्वामित्व र सहभागिता, पूर्ण खोप पालिका हाम्रो प्रतिवद्धता’भन्ने नाराका साथ गाउँपालिका अध्यक्ष अर्जुन गुरुङले पूर्णखोप सुनिश्चितता दिगोपना गाउँपालिका घोषणा गरेका हुन् ।
पहिलो चरणमा पालिकाका सबै वडालाई पूर्ण खोप सुनिश्चितता तथा दिगोपना घोषणा गरिएको र हाल सोही तथ्याङ्क र सूचकका आधारमा पूर्ण खोप सुनिश्चितता तथा दिगोपना गाउँपालिका घोषणा गरिएको स्वास्थ्य शाखा प्रमुख लुल घलेले बताए ।
स्वास्थ्य शाखाले दिगोपना र पूर्ण खोप सुनिश्चितताका लागि चैत मसान्तभित्र जन्मिए देखि १५ महिना र १६ देखि २३ महिनाको पाईरहेका, पाईसकेका र छुटेका बालबालिकाहरुको खोपको घरभेट सर्वेक्षण गरिएको थियो । सो अबसरमा वडा नं. ९ मा छुटेका दुई बालबालिकालाई खोप दिइएको थियो ।
गाउँपालिकामा जन्मेदेखि १५ महिनाका २ सय ४२ र १६ देखि ४९ महिनाका ५ सय ५२ जना बालबालिकाले सबै प्रकारका खोप लगाएको तथ्याङ्क रहेको पब्लिक हेल्थ नर्स मोनिका तामाङले जानकारी दिईन् ।
गाउँपालिकामा १३ वटा स्वास्थ्य संस्थाले २७ वटा खोप केन्द्रबाट हरेक महिना तोकिएको मितिमा नियमित रुपमा खोप सेवा प्रदान गर्दै आएको छ । पालिकालाई २०७४ चैत ३० गते पूर्ण खोप सुनिश्चित घोषणा गरिएको थियो ।
गाउँपालिका अध्यक्ष अर्जुन गुरुङले सबै स्वास्थ्य संस्थामा संघीय संरचना अनुरुपको निर्देशिकाअनुसार स्वास्थ्य संस्था सञ्चालन तथा ब्यवस्थापन समिति र वडा खोप समन्वय समितिको गठन भै आ–आफ्नो भूमिका र जिम्मेवारी निर्वाह गरिरहेको बताए ।
कार्यक्रममा गाउँपालिका उपाध्यक्ष जुनामाया थापा, प्रमुख प्रशासकीय अधिकृत तारा बहादुर तामाङ, वडाअध्यक्षहरु लगायतको उपस्थिति थियो । कार्यक्रमका सहभागीहरुले पूर्णखोप सुनिश्चता तथा दिगोपना कायमका लागि प्रतिवद्धता पत्रमा हस्ताक्षर गरेका थिए ।
