लमजुङ । मस्र्याङ्दी गाउँपालिका–८ बडागाउँ निवासी मंगले बसेलले मुटुरोगबाट पीडित आफ्नो श्रीमतीको उपचारको लागि सहयोगको अपिल गर्नुभएको छ । मगंलेको श्रीमती २३ वर्षीय सविना सार्की बसेल हाल काठमाडौंस्थित टिचिङ हस्पिटलको बेडमा उपचाररत रहेकोमो मुटुको दुवै भल्भ फेर्नुपर्ने भएकोले सहयोगको अपिल गरिएको हो ।
गत असोजदेखि चितवन, काठमाडौंको मनमोहन मेमोरियल अस्पताल र गंगालाल हँुदै हाल टिचिङ्ग हस्पिटलमा सविनाको उपचार भइरहेको छ । विगत १० वर्षदेखि नै स्वास्थ्यमा सामान्य समस्या देखिँदै आए पनि सविनाको मुटुमा समस्या देखिएर उपचार गराउन थालेको भने चार महिना भएको पीडितका श्रीमान् मंगले बसेलले बताउनुभयो । श्रीमतीको उपचारमा हालसम्म पाँच लाखभन्दा बढी रकम खर्च भइसकेको बताउँदै सहयोगको अनुरोध गर्नुभएको छ । उपचार खर्च जुटाउन घर आउनुभएका मंगलेले आइतबार बेसीशहरमा पत्रकारहरुमाझ बिरामीको गम्भीरता, पारिवारिक आर्थिक अवस्था बताउँदै सहयोगका लागि सबैसँग अनुरोध गरिदिन आग्रह गर्नुभएको छ ।
अस्पतालले सविनाको मुटुको दुवै भल्भ फेर्न पाँच लाख रुपैयाँ लाग्ने बताएको भन्दै उहाँले सहयोगको याचना गर्नुभएको हो । ‘आफ्नो आर्थिक अवस्थाले धान्ने स्थिति छैन, सबैले सहयोग गर्नुभएमा श्रीमतीको जीवन बच्ने थियो’ बसेलले भन्नुभयो ।
मस्र्याङ्दी–५ खोरियाखेतका बसेल हाल सोही पालिकाको वडा नं. ८ बडागाउँस्थित ठूलोबुवाको घरमा बस्दै आउनुभएको छ । उहाँको ६ वर्षीय छोरी छन् । सविनाको उपचारमा सहयोग चाहनेले मंगले बसेलको हिमालयन बैंक लिमिटेडको खाता नम्बर ११०२३०३९४०००१६ मा रकम जम्मा गर्न सक्नुहुनेछ ।
