लमजुङ । बेसीशहर नगरपालिका–२ टारगाउँका वीरबहादुर विकले आफ्नो बारीमा गोलभेँडा र तरकारी खेती उत्पादन गर्नुहुन्छ, तर उत्पादित तरकारी किन्नकै लागि भनेर उहाँकोसम्म व्यापारी पुग्दैनन् ।
उत्पादित तरकारी बिक्री गर्न उहाँलाई तीन किलोमिटर टाढा बेसीसहर बजारमा पुग्नुपथ्र्यो भने उत्पादित तरकारीले उचित मूल्यसमेत पाउन मुस्किल थियो ।
बेसीसहर–१० बाँझाखेतका किसान केशबहादुर गुरुङको पीडा पनि विकको जस्तै छ । आफ्नो बारीमा उत्पादन गरेको घिरौला, काक्रा, लौका, सिमी, बोडी र गोलभेँडा बिक्रीका लागि उहाँ पनि पाँच किलोमिटरको दूरी पार गर्दै बेसीसहर बजार आइपुग्नपर्छ ।
तर अहिले बेसीसहर नगरपालिकाले उत्पादित तरकारी विक्रीका लागि किसान घर र ढुवानीका लागि कृषि एम्बुलेन्स सञ्चालनमा ल्याएपछि उत्पादित तरकारी बिक्री गर्न किसानहरुलाई सहज भएको छ ।
नगरपालिका भित्रका किसानले उत्पादन गरेका तरकारी, फलफल तथा अन्य उत्पादन बजारसम्म ल्याउनका लागि नगरपालिकाले कृषि एम्बुलेन्स सञ्चालनमा ल्याएको हो । नगरपालिकाले एकता कृषि सहकारी संस्थालाई कृषि एम्बुलेन्स सञ्चालनको जिम्मेवारी दिएको छ ।
बेसीशहर नगरपालिकाका प्रमुख गुमानसिंह अर्यालले एकता कृषि सहकारी संस्थाका अध्यक्ष हरिबहादुर घिमिरेलाई कृषि एम्बुलेन्सको चावि हस्तान्तरण गरी सञ्चालनको जिम्मेवारी दिनुभयो । स्वामित्व नगरपालिकामै रहनेगरी आगामी असार मसान्तसम्म संचालन तथा व्यबस्थान एकता कृषि सहकारी संस्थाले गर्ने सम्झौता भएको बेसीशहर नगरपालिकाका प्रमुख प्रशासकीय अधिकृत चेतनाथ अर्यालले बताउनुभयो ।
व्यवसायी युवाहरुले गठन गरेको एकता कृषि सहकारी संस्थाले केही समयअघि बेसीशहर–८ ठाडो लाइनमा ‘किसान घर’ सञ्चालनमा ल्याएको छ । किसानले स्थानीय क्षेत्रमा गरेको उत्पादन खासगरी तरकारीलाई उचित मूल्यमा बिक्री गर्न र उपभोक्तालाई पनि सस्तो मूल्यमा खरिद गर्न सहज होस् भन्ने उद्देश्यले किसान घर सञ्चालन गरिएको हो ।
कृषि एम्बुलेन्स भएपछि किसानका उत्पादन बजारमा ल्याउन सहज हुने र तालिका बनाएर गाउँगाउँबाट किसानका उत्पादन संकलन गरिने एकता कृषि सहकारी संस्थाका अध्यक्ष हरिबहादुर घिमिरले बताउनुभयो । किसानका उत्पादन उपभोक्ताको भान्सासम्म पु¥याउन बजारका चोक–चोकमा कृषि एम्वुलेन्स मार्फत तरकारी बेच्ने उहाँले बताउनुभयो ।
