लमजुङ । खेतबारी जोत्नका लागि बेसीशहर नगरपालिकाले किसानहरुलाई हाते ट्याक्टर (मिनीटिलर) वितरण गरेको छ । नगरपालिकाले ५० प्रतिशत अनुदानमा ३५ वटा हाते ट्याक्टर (मिनीटिलर) वितरण गरेको हो ।
बेसिशहर नगरपालिकाका प्रमुख गुमानसिंह अर्यालले कृषिलाई यान्त्रिकरण गर्दा उत्पादनमा बृद्धि भएकोले प्रत्येक बर्ष हाते ट्याक्टर वितरण गर्ने गरेको बताउनुभयो । नगरपालिकाले कृषि क्षेत्रलाई यान्त्रिकरण र व्यवसायिक बनाउन जोड दिँदै आएको र कृषि उत्पादन विना नगरपालिकाले समृद्धि हासिल गर्न नसक्ने उहाँले बताउनुभयो ।
नगरपालिकाले सात र्हस पावरको ५३ हजार एक सय ७५ रुपियाँ, ६ र्हस पावरको ४९ हजार तिन समय ७५ र पाँच र्हस पावरको ३२ हजार आठ सय ७५ रुपैयाको ५० प्रतिशत अनुदानमा किसानलाई हाते ट्याक्टर वितरण गरेको हो । नगरपालिकाले सार्वजनिक सूचना जारी गरि आवेदन माग गरेकोमा बढी आवश्यकता र भूगोल मिलाएर किसान छनोट गरि चालु बर्षको बजेटबाट ३५ वटा हाते ट्याक्टर वितरण गरेको हो ।
किसानको मागको आधारमा सात र्हस पावरको १० वटा, ६ र्हस पावरको २१ वटा र ५ र्हस पावरको ४ वटा हाते ट्याक्टर विरण गरिएको प्रमुख प्रशासकीय अधिकृत चेतनाथ अर्यालले जानकारी दिनुभयो ।
कृषि ज्ञान केन्द्र लमजुङका प्रमुख सुदिप खतिवडाले जिल्लामा हाते ट्याक्टरको प्रयोग बढीरहेको बताउनुभयो । उहाँले कृषिका विभिन्न औजारहरुको उपयोगले लागत र समयको बचतको बचत हुने बताउनुभयो ।
