लमजुङ । लमजुङका पाँचवटा क्याम्पसमा भएको स्वतन्त्र विद्यार्थी युनियन (स्ववियु) निर्वाचनमा नेपाल विद्यार्थी संघ (नेविसंघ) ले चार वटामा र अखिल नेपाल स्वतन्त्र विद्यार्थी युनियन (अनेरास्ववियु) ले एउटा क्याम्पसमा विजय बनेको छ ।
सुन्दरबजारस्थित लमजुङ कृषि क्याम्पस, भक्तिआदर्श, मातृभूमी र मध्यनेपालको सोतिपसलस्थित मंगला क्याम्पसमा नेविसंघको प्यानल निर्वाचित भएको छ । सदरमुकाम बेसीसहरस्थित मम्र्याङ्दी बहुमुखी क्यापसमा भने अनेरास्ववियुको प्यानल विजयी बन्यो ।
सबैभन्दा बढी राजनीतिक गतिविधि र विद्यार्थी संगठनहरुविच पेचिलो संघर्ष भैरहने लमजुङको सुन्दरबजारस्थित कृषि र पशु विज्ञान अध्ययन संस्थान (लमजुङ क्याम्पस) मा अनेरास्ववियु र अखिल क्रान्तिकारीका संयुक्त उम्मेदवारलाई हराउँदै नेविसंघले प्यानलै जित निकालेको हो । नेविसंघबाट सभापतिमा असिम वस्ती, सचिवमा विवेक सिंह र कोषाध्यक्षमा हेमनारायण रसाइली विजयी हुनुभयो । सदस्यहरुमा आर्ची पाठक, अफजल अन्सारी, विविका थापा मगर, आयुशका गौतम र अवसर अधिकारी विजयी हुनुभयो ।
सुन्दरबजार नगरपालिका ९, भोटेओडारस्थित भक्ति आदर्श क्याम्पसको स्ववियु निर्वाचनमा नेविसंघबाट सभापतिमा सुशिल अधिकारी, सचिवमा अर्पणा अधिकारी र कोषाध्यक्षमा निशु गुरुङ निर्वाचित हुनुभयो । सदस्यहरुमा नेविसंघका सुजाता कार्की, अनिशा ढुंगाना र मन्दिरा घिमिरे निर्वाचित हुनुभयो ।
सुन्दरबजार नगरपालिका ७, सुन्दरबजारमा रहेको मातृभूमि क्याम्पस सभापतिमा विशाल थापा, सचिवमा सरला अधिकारी, कोषाध्यक्षमा अञ्जली विक निर्वाचित हुनुभयो । सदस्यमा अस्मिता पौडेल, प्रियङ्का क्षेत्री र रक्षा पोखरेल निर्वाचित हुनुभयो ।
मध्यनेपाल नगरपालिका ३, सोतीपसलस्थित मंगला क्याम्पसमा अन्य विद्यार्थी संघ संगठनको उमेदवारी दर्ता नभएपछि नेविसंघबाट सभापतिमा रामचन्द्र खनाल, सचिव रामकुमार श्रेष्ठ र कोषाध्यक्षमा राधा सिंजाली निर्वाचित हुनुभयो । सदस्यहरुमा दिपक ओझा, कृष्णमुरारी कगाले, मनिता भुजेल, मनिषा नेपाली, शुष्मा अधिकारी, सुकमित गुरुङ, अनिल मिश्र र विनोद न्यौपाने रहनुभएको छ ।
सबैभन्दा धेरै विद्यार्थी रहेको सदरमुकाम बेंसीसहरमा रहेको मस्र्याङ्दी बहुमुखी क्याम्पसमा अनेरास्ववियुको जीत भएको छ । नेविसंघका पूर्णबहादुर गुरुङलाई ३ मतले हराउँदै अनेरास्ववियुका मदनकुमार विक स्ववियु सभापतिमा निर्वाचित हुनुभयो ।
सचिवमा अनेरास्ववियुका गणेश अधिकारी, कोषाध्यक्षमा अनेरास्ववियुकी मुना गुरुङ, निर्वाचित हुनुभयो । सदस्यमा अनेरास्ववियुका विशेष गुरुङ, ममता घिमिरे, सुदर्शन पौडेल र हेमकुमारी विक विजयी हनुभयो । सदस्यमा नेविसंघकी वर्षा रिमाल र ३ जनाको बराबरी मत प्राप्त भएकोमा गोलाप्रथाबाट अनेरास्ववियुकी रुक्मणी वर्देवा विजयी हुनुभयो ।
मध्यनेपाल नगरपालिका ४, दुइपिप्ले रम्घास्थित पुष्पलता जनएकता क्याम्पस र वडा नं. ६, भार्लेटारस्थित ईशानेश्वर क्याम्पसमा चुनावी प्रक्रिया नै अघि नबढेको प्रमुख जिल्ला अधिकारी बुद्धबहादुर गुरुङले जानकारी दिनुभयो ।
