लमजुङ । वरीपरी सेता हिमाल । गाउँ माथिको जंगलमा फुलेका ढकमक लालिगुराँस । लमजुङको काउँलेपानी वरपर देखिने यी सुन्दर दृश्यले पर्यटकलाई आकर्षित गरेको छ । यहाँ पुग्ने पर्यटक हिमाल र लालीगुराँसको दृश्यमा मनमुग्ध हुने गरेका छन् ।
नेपालकै नमुना होमस्टेबाट पुरस्कृत काउँलेपानी होमस्टेले पनि लालिगुराँसको मौसमलाई सदुपयोग गर्दै पर्यटकलाई ‘लालीगुराँस प्याकेज’ बेचिरहेको छ । होमस्टेको लालिगुराँस प्याकेजमा आन्तरिक पर्यटकहरु आकर्षित भैरहेका छन् । १२ महिने प्याकेजअन्तर्गत फागुनदेखी चैतसम्म लालीगुराँस प्याकेज रहने होमस्टे व्यवस्थापन समितिले जनाएको छ ।
लालीगुराँस प्याकेजमा दैनिक पर्यटक आगमन बढीरहेको समितिका अध्यक्ष देवबहादुर गुरुङले बताउनुभयो । “अहिले बनैभरि लालीगुराँस फुलेको छ । वरपर हिमालहरु खुलेका छन,” गुरुङले भन्नुभयो, “लालीगुराँस र हिमाल हेर्न आउने पर्यटकले होमस्टे भरिभराउ भैराछ ।”
काउलेपानी जाने बाटैदेखि पर्यटकको लालिगुराँस र हिमालसँग साक्षतकार हुन्छ । गाउँमाथि पुरानकोटसम्मै बनैभरि लालीगुराँस फुलेका छन् । यो समयमा हिमाली दृश्यवलोकन पनि उत्कृष्ट देखिन्छ । हिमाल र लालिगुराँसको यो समयलाई समात्दै गाउँ आएका पर्यटकलाई भुलाउने गरिएको अध्यक्ष गुरुङले बताउनुभयो । पर्यटकलाई लालीगुराँस टिप्न भने रोक लगाइएको छ ।
काउलेपानी होमस्टे व्यवस्थापन समितिका अनुसार चैत बैशाखमा ऐसेँलु काफल प्याकेज सुरु हुन्छ । समितिका अनुसार जेठ महिनामा जडिबुटी प्याकेज, असारमा धान रोपाइँ प्याकेज र साउनमा कोदो रोपाइँ प्याकेज हुन्छन । यसैगरी भदौ महिनामा जात्रा प्याकेज, असोजमा चाडपर्व प्याकेज, कात्तिकमा कटुस प्याकेज, मसिरमा दाइँ प्याकेज, पुसमा कोदो चुट्ने प्याकेज र माघमा तरुल प्याकेज बनाइएको काउलेपानी होमस्टे व्यवस्थापन समितिले जनाएको छ ।
२५ घरधुरी रहेको काउलेपानीमा १५ घरमा होमस्टे सञ्चालन छ । जसमा ८४ वेड रहेको छ । सदरमुकाम बेसीशहरबाट मोटरमा आधा घण्टामा पुगिने काउलेपानी गाउँ समुन्द्री सतहदेखि एक हजार छ सय मिटर उचाइमा छ ।
काउलेपानीबाट बुद्ध, मनास्लु, अन्नपूर्ण, लमजुङ लगायत १४ वटा हिमश्रृङ्खलाहरु देख्न सकिन्छ । लमजुङ दरबार, काउलेपानी देवी मन्दिर लगायत ऐतिहासिक महत्व बोकेको काउलेपानी क्षेत्रमा गुरुङ, नेवार, भुजेल लगायतका जातजातिको बसोबास छ । काउलेपानीको होमस्टेसंगै स्थानीयवासिन्दाको कला, संस्कार र संस्कृतिले काउलेपानी पर्यटकीय गन्तब्यको रुपमा विकसित हुँदै गएको छ । गाउँमा पाहुना आएको बेला उनीहरु सामूहिक रुपमा स्वागत सत्कारमा जुट्दै कौडा, चुट्का, घाँटु जस्ता संस्कृति देखाउने गर्छन् । त्यहाँ पुग्ने पर्यटकले शिरखोला आमा समूहको भब्य स्वागत सत्कार र विदाई समेत पाउने गरेका छन् ।
