लमजुङ । लमजुङको सुन्दरबजार नगरपालिका–७ पाउँदीमा प्रहरी चौकीको नयाँ भवन निर्माण गरि सेवा सुरु गरिएको छ । प्रहरी प्रधान कार्यालय, भौतिक पूर्वाधार निर्देशनालयका प्रमुख प्रहरी नायव महानिरिक्षक ई. फडिन्द्र बरालले नवनिर्मित प्रहरी चौकी भवनको सोमबार उद्घाटन गर्नुभयो ।
नवनिर्मित प्रहरी चौकी भवनको उद्घाटन गर्नुहुँदै प्रहरी नायव महानिरीक्षक बरालले नेपाल प्रहरीलाई पूर्वाधार, सीप, सुविधा र प्रविधिमा राम्रो बनाउँदै लैजानुपर्ने बताउनुभयो । उहाँले प्रहरी आफुँ सुरक्षित हुन सकेमा नागरिकलाई राम्रो सेवा दिन सक्ने बताउनुभयो । नागरिकमैत्री सेवा प्रवाह गर्न पूर्वाधारको ठुलो भूमिका हुने उहाँले बताउनुभयो । शान्ति सुरक्षा कायम गर्न, अपराध नियन्त्रण तथा अनुसन्धानका लागि प्रहरीलाई राम्रो भौतिक संरचनाको आवश्यकता पर्ने उहाँको भनाई थियो ।
प्रहरी नायव उपरीक्षक ईन्जिनियर ध्रुव अधिकारीले नवनिर्मित भवनमा कार्य प्रशासन शाखा, महिला÷पुरुष हिरासत कक्ष, महिला पुरुषको व्यारेक, ईन्चार्ज आवास, भान्सा तथा चर्पीसहितको आधुनिक भवन निर्माण गरिएको बताउनुभयो ।
जिल्ला प्रहरी कार्यालय लमजुङको निमित्त प्रमुख प्रहरी निरिक्षक चुनु गुरुङका अनुसार तीन रोपनी एक आना तीन दाम क्षेत्रफलमा बनाइएको भवन आरसिसि फ्रेम स्टक्चर अबधारणामा निर्माण गरिएको छ । नवनिर्मित भवन महिला र फरक क्षमता ब्यक्तिमैत्री रहेको उहाँले बताउनुभयो ।
क्रेटर चन्द्रायन जेभीसँग २०८० असार १५ गते सम्झौता भई भ्याटसहित दुई करोड २८ लाख ४३ हजार चारसय ७६ रुपियाँ लागतमा प्रहरी चौकीको भवन निर्माण गरिएको जिल्ला प्रहरी कार्यालयका सूचना अधिकारी प्रहरी निरिक्षक अविशेक पाण्डेले जानकारी दिनुभयो ।
उद्घाटन समारोहमा मन्तब्य राख्दै प्रमुख जिल्ला अधिकारी बुद्धबहादुर गुरुङ, सुन्दरबजार नगरपालिकाका पूर्व मेयर जनकराज मिश्र, सुन्दरबजार–७ का वडाअध्यक्ष जयराम रेग्मीले नयाँ भवनबाट यस क्षेत्रका नागरिकले सर्वसुलभ शान्तिसुरक्षा र सेवा विश्वास ब्यक्त गर्नुभयो ।
