लमजुङ । विद्यालयमा शैक्षिक सामाग्री र तालिम दिन्छु भनि रकम ठगी गर्दै हिड्ने एक युवकलाई स्थानीयले नियन्त्रणमा लिएर प्रहरीलाई बुझाएका छन् ।
हरिपुर नगरपालिका–२ सर्लाही घर बताउने वर्ष २७ का वीरेन्द्र कुमारलाई लमजुङको दुधपोखरी गाउँपालिका–५ कोल्की र गोरखाको सिरानचोक गाउँपालिका–१ सिरानचोकका स्थानीयले नियन्त्रणमा लिएर प्रहरीलाई बुझाएका हुन् । कुमारले केही दिनदेखि लमजुङको दुधपोखरी गाउँपालिका र सिमाना जोडिएको गोरखाको सिरानचोक गाउँपालिकाका विभिन्न गाउँमा ठगी गर्दै हिडेको स्थानीयले बताएका छन् ।
आइतबार दिउसो दुवै गाउँका स्थानीय जुटेर नेपाने जंगलमा भाग्दै गर्दा कुमारलाई समातिएको स्थानीय केवि गुरुङले जानकारी दिनुभयो । स्थानीयले उनलाई समातेर सिरानचोकस्थित धारापानी प्रहरी विटमा बुझाएका थिए । धारापानी प्रहरीले लमजुङको विचौरस्थित प्रहरी चौकीलाई बुझाएको छ ।
नियन्त्रणमा लिइएका कुमारलाई सोमबार विहान जिल्ला प्रहरी कार्यालय बेसीसहर ल्याइएको निमित्त प्रहरी प्रमुख प्रहरी निरिक्षक चुनु गुरुङले जानकारी दिनुभयो । उनीबारे थप अनुसन्धान अघि बढाइएको उहाँले बताउनुभयो ।
कुमारको साथबाट प्रहरीले पाँचवटा मोवाइल र लु.९३ प ७८११ नम्बरको मोटरसाइकल सहित केही सामाग्री बरामद गरेको छ । उनले दुधपोखरी–५ कोल्कीस्थित बुद्ध प्राथामिक विद्यालयमा तीन वर्षसम्म शैक्षिक सामाग्री दिने, बालशिक्षा र कार्यालय सहयोगीलाई तालिम प्रदान गर्ने जस्ता प्रलोभन देखाएर रकम ठगी गरेको विद्यालयले जनाएको छ ।
विद्यालयका प्रधानाध्यापक शम्भुलाल तामाङले कुमारले बेसीसहर–७ मा कार्यालय रहेको भनि एजुकेशन लर्निङ डेभलपमेन्ट फाउन्डेसन नेपाल नामक संस्थाको नाममा रसिद काटेर रकम ठगेको बताउनुभयो । “तालिम र शैक्षिक सामाग्री सहयोग गर्छु भनेर ५४ सय लिएर गयो । तर, ठग पो रहेछ । अन्तपनि त्यस्तै गरेको सुनेपछि सबै मिलेर समात्यौं”, उहाँले भन्नुभयो ।
