लमजुङ । मध्यपहाडी (पुष्पलाल) लोकमार्ग अन्र्तगत लमजुङ खण्डको केही स्थानमा लामो समयदेखि रहेको विवाद नसुल्झिदा सडक निर्माण सुरु हुन सकेको छैन् ।
सुन्दरबजार र भोर्लेटार क्षेत्रमा बस्तीभित्रबाट सडक बनाउने योजनाको विरोधमा स्थानीय उत्रिदा सडक निर्माणको काम हुन नसकेको हो । सात वर्षदेखि स्थानीयले संघर्ष समिति बनाएर सडक निर्माणमा अबरोध गरिरहेका छन् ।
स्थानीयको अवरोधले सुन्दरबजार–७ क्याम्पस गेटदेखी खत्रीठाँटीसम्म दुई किलोमिटर र मध्यनेपाल–६ भोर्लेटार रानीपानी चोकदेखी मिदिमखोला पुलसम्म १७०० मिटर सडक निर्माण हुन सकेको छैन । लोकमार्गको मापदण्ड अनुसार दायाँबायाँ ३१÷३१ मिटर फराकिलो बनाएमा बजार ध्वस्त हुने र अर्बौं रुपैयाँको नोक्सान हुने भन्दै स्थानीयले विरोध गरिरहेका छन् ।
सडक विस्तार गर्दा आफ्नो घर–जग्गामा असर पर्ने भएकाले उचित क्षतिपूर्ति दिनुपर्ने माग स्थानीयको छ । सुन्दरबजार–८ का रामप्रसाद पण्डितले स्थानीयलाई उचित क्षतिपूर्तिसहितको प्रक्रिया अपनाए अबरोध नहुने बताउनुभयो ।
सुन्दरबजारका श्रीचन्द्र लामिछानेको संयोजकत्वमा गठित संघर्ष समितिले सडक निर्माणको बिरुद्द दुई वर्षअघि नै सर्बोच्च आदालतमा मुद्दा दायर गरेको थियो । तर, सर्वोच्वले अहिलेसम्म कुनै फैसला गरेको छैन् । गण्डकी प्रदेश सरकारले समस्या समाधानका लागि तत्कालिन भौतिक पूर्वाधार मन्त्रीको नेतृत्वमा कार्यदल नै बनाएपनि समाधान गर्न सकेन । लमजुङका प्रतिनिधिसभा सदस्य एवं सञ्चार तथा सूचना प्रविधिमन्त्री पृथ्वीसुब्बा गुरुङलेपनि पटक–पटक पहलकदमी लिँदापनि स्थानीय टसमस भएका छैनन् ।
सडक निर्माणकालागि सम्झौता अनुसारको समय अब दुई महिना मात्र बाँकी छ । लोकमार्ग योजना कार्यालय, पालुङटार गोरखाका प्रमुख ईश्वर बहादुर रिजालले स्थानीयको अबरोधका कारण सडक निर्माण अन्योलमा परेको बताउनुभयो । स्थानीयको अबरोध हटेमा हप्ता दिनमा काम शुरु गरेर दुई महिना भित्र काम सम्पन्न गर्न सकिने उहाँले बताउनुभयो ।
स्थानीयको अबरोध नहट्दासम्म निर्माणको काम अघि नबढ्ने योजना कार्यालय पालुङ्टारले जनाएको छ । विवाद समाधन गर्ने प्रमुख दायित्व जनप्रतिनिधि, राजनीतिक दल, स्थानीय तह र स्थानीयबासीको नै भएको आयोजनाले जनाएको छ ।
सुन्दरबजार नगरपालिकाका प्रमुख कृष्णप्रसाद कोईरालाले सडक निर्माणमा अवरोध हुनु दुःखद भएको बताउनुभयो । उहाँले स्थानीयको जायज माग सम्बोधन गर्दै निर्माणको काम अघि बढाउन पहल गरिरहेको बताउनुभयो ।
पुर्वको पाँचथर देखि पश्चिम बैतडीसम्मको एकहजार सातसय ८७ किलोमिटर लम्बाईको मध्यपहाडी लोकमार्ग लमजुङमा ४५ किलोमीटर पर्छ । विवाद रहेको स्थानबाहेक बाँकी स्थानमा धेरैजसोमा कालोपत्र भैसकेको छ भने केही स्थानमा कालोपत्रको काम भैरहेको छ ।
