लमजुङ । नेकपा एमालेको महिला संगठन अखिल नेपाल महिला संघ लमजुङले आयोजना गरेको पालिकास्तरीय हाजिरीजवाफ प्रतियोगितामा अखिल नेपाल महिला संघ क्व्होलासोथार गाउँपालिका कमिटी प्रथम भएको छ ।
संघले ११५ औं अन्तर्राष्ट्रिय श्रमिक महिला दिवसको अवसरमा शुक्रवार मदन आश्रित स्मृति भवन बेंसीशहरमा आयोजना गरेको पालिकास्तरीय हाजिरीजवाफ प्रतियोगितामा १४ अंकसहित क्व्होलासोथार गाउँपालिका कमिटी प्रथम भएको हो । प्रतियोगिता प्रश्नोत्तर र गाउँ खाने कथासहित २ चरणमा आयोजना गरिएको थियो ।
प्रतियोगितामा ९ अंकसहित दोर्दी गाउँपालिका कमिटी द्धितीय भएको छ । बेंसीशहर नगरपालिका कमिटी ८ अंकसहित तृतीय बनेको छ । सुन्दबजार नगरपालिका कमिटी र मस्र्याङ्दी गाउँपालिका कमिटी सान्त्वना भएका अखिल नेपाल महिला संघ जिल्ला कमिटी अध्यक्ष पवित्र थापा रानाले जानकारी दिनभयो ।
प्रतियोगितामा प्रथम हुने क्व्होलासोथारलाई ५ हजार रुपैयाँ, द्धितीय हुने दोर्दीलाई ३ हजार रुपैयाँ, तृतीय हुने बेंसीशहर नगरपालिका कमिटीलाई २ हजार र सान्त्वना सुन्दरबजार र मस्र्याङ्दीलाई १–१ हजार रुपैयाँप्रदान गरिएको छ ।
कार्यक्रमलाई सम्बोधन गर्दै अखिल नेपाल महिला संघ केन्द्रीय कमिटी सदस्य लक्ष्मीदेवी अधिकारीले महिलामा सचेतनासंगै सक्रियताको खाँचो रहेको औंल्याउनुभयो । सामाजिक गतिविधिमा सक्रिय र अग्रसर हुने महिलाले क्षमता र शिक्षा आर्जन गर्न सक्ने भएकाले यसबाट समाजमा अघि बढ्ने बाटो खुल्ने उहाँले बताउनुभयो ।
कार्यक्रममा अखिल नेपाल महिला संघ गण्डकी प्रदेश कमिटी सहसचिव पदमा गुरुङ, नेकपा एमाले जिल्ला कमिटी लमजुङका अध्यक्ष राजकुमार विष्ट, उपाध्यक्ष जितबहादुर गुरुङ, जनसंगठन संयन्त्र प्रमुख जुनबहादुर तामाङ, क्व्होलासोथार गाउँपालिका उपाध्यक्ष गमीमाया गुरुङ, आशा तामाङलगायतको उपस्थिति रहेको थियो ।
कार्यक्रममा संघका जिल्ला उपाध्यक्ष बुनाकुमारी रिमालले स्वागत मन्तव्य राख्नुभयो भने सञ्चालन सचिव विमला पौडेलले गर्नुभयो । हाजिरीजवाफ प्रतियोगिताको सञ्चालन सदस्य रेणुका ठकुरीले गर्नुएको थियो ।
