लमजुङ । लमजुङको सुन्दरबजार नगरपालिकामा कृषि अनुसन्धान तथा प्रसारमा लमजुङ कृषि क्याम्पसले सघाउने भएको छ ।
त्रिभुवन विश्व बिद्यालय कृषि र पशु बिज्ञान अध्ययन संस्थान लमजुङ क्याम्पस र सुन्दरबजार नगरपालिका बिच सहकार्यको सम्झौता भएको हो । पालिकाका भित्रका कृषकको सहजता र समग्र कृषि क्षेत्रको विकासमा सहकार्यका लागि नगरपालिका र क्याम्पस विच विभिन्न १४ बुँदामा समझदारी भएको नगरपालिकाका प्रमुख कृष्णप्रसाद कोइरालाले जानकारी दिनुभयो ।
“सुन्दरबजार नगरपालिका क्षेत्रका कृषक तथा समुदायका लागि कृषि शिक्षा, कृषि अनुसन्धान, कृषि प्रसार तथा पशु र वातावरण क्षेत्रको प्रवद्र्धनको लागि क्याम्पससँग समझदारी भएको छ”, नगर प्रमुख कोइरालाले भन्नुभयो, “यो कार्यले कृषि अनुसन्धान, कृषि शिक्षा, विकास र प्रवद्र्धनमा टेवा पुग्ने अपेक्षा गरेका छौं ।”
कृषि अनुसन्धान, कृषि प्रसार र कृषि शिक्षा लगायतका क्षेत्रहरुमा नगरपालिका, क्याम्पस र कृषकहरु बीचको सहकार्यलाई प्रोत्साहन गर्न प्राध्यापक तथा विद्यार्थीहरु परिचालन गरिनेछ । यसैगरी नगरपालिका, कृषि विकास शाखा, वडा कार्यालय, कृषि समुह, सहकारी संस्थाहरुमा कृषि योजना तर्जुमा सम्बन्धी क्षमता अभिविद्धि गर्ने, नगरपालिका, वडा, सहकारी तहका कृषि प्राविधिक तथा अगुवा कृषकहरुलाई कृषि र पशुपालन सम्बन्धी तालिम प्रदान गरिने लमजुङ क्याम्पसका प्रमुख डा. रामकुमार श्रेष्ठले बताउनुभयो ।
दुई संस्थाविच उन्नत प्रविधिहरुको नमुना प्रर्दशनी, एकीकृत कृषि, पशु बाँझोपन उपचार शिविर संचालन तथा प्राविधिक परामर्श सेवा प्रवाह गरिने श्रेष्ठले जानकारी दिनुभयो । सम्झौताको अबधीमा प्रयोगशालामा माटोको परीक्षण, बिश्लेषण तथा मलखादको सिफारिस सम्बन्धी परामर्श सेवा प्रवाह गर्ने समझदारी भएको छ ।
यसैगरी बालीको रोगकिरा, अन्य व्यवस्थापकीय समस्याहरुको प्रयोगशाला पहिचान, विश्लेषण र व्यवस्थापन सम्बन्धी परामर्श सेवा प्रदान गर्ने, पशुमा रोगका वारेमा प्रयोगशालामा पहिचान गर्ने, स्थानीय स्तरका जैबिक विविधता, औषधीय बनस्पति, संरक्षण तथा प्रोत्साहन कार्यक्रम संचालन गर्ने दुई संस्थाविच समझदारी भएको छ ।
कृषि प्रसारका लागि विविध प्रकाशन, अभिमूखिकरण, तालिम, कार्यशाला, गोष्ठि, सेमिनार, अभियान आदि संचालन गर्ने, सोका लागि आवश्यक वजेट सुन्दरबजार नगरपालिकाले व्यवस्था गर्ने र प्राविधिक सहयोग लमजुङ क्याम्पसले उपलब्ध गराउने भएको छ । विद्यालयमा कृषि उत्पादन र असल खानेबानी विकास सम्बन्धी कार्यक्रम संचालन गर्ने, रैथाने बालीबाट बन्ने परिकारबारे प्रचार प्रसार गर्ने समेत सम्झौता भएको छ ।
दुवै पक्षको सहकार्यमा हुने कार्यहरुको सहजिकरणका लागि समन्वय समिति समेत गठन भएको छ । समितिको संयोजकमा नगरप्रमुख कोइराला, सदस्यमा उपप्रमुख भवानी केसी, प्रमुख प्रशासकिय अधिकृत, क्याम्पस प्रमुख, सहायक क्याम्पस प्रमुख, सुन्दरबजार नगरपालिका योजना शाखा प्रमुख र कषि विकास शाखा प्रमुख रहनुभएको छ ।
