लमजुङ । लमजुङको मध्यनेपाल नगरपालिका–२ सोतीपसलमा प्रहरी चौकीको नयाँ भवन निर्माण गरिएको छ । मंलबार नेपाल प्रहरीका गण्डकी प्रदेश प्रमुख प्रहरी नायव महानिरीक्षक भोलाबहादुर रावलले नवनिर्मित प्रहरी चौकी भवनको उद्घाटन गर्नुभयो ।
नवनिर्मित प्रहरी चौकी भवनको उद्घाटन गर्नुहुँदै प्रहरी नायव महानिरीक्षक रावलले नेपाल प्रहरीलाई पूर्वाधार, सीप, सुविधा र प्रविधिमा राम्रो बनाउँदै लैजानुपर्ने बताउनुभयो । उहाँले नागरिकमैत्री सेवा प्रवाह गर्न पूर्वाधारको ठुलो भूमिका हुने बताउनुभयो । शान्ति सुरक्षा कायम गर्न, अपराध नियन्त्रण तथा अनुसन्धानका लागि प्रहरीलाई राम्रो भौतिक संरचनाको आवश्यकता पर्ने उहाँले बताउनुभयो ।
प्रहरी नायव उपरीक्षक ईन्जिनियर ध्रुव अधिकारीले नवनिर्मित भवनमा कार्य प्रशासन शाखा, महिला÷पुरुष हिरासत कक्ष, महिला पुरुषको व्यारेक, ईन्चार्ज आवास, भान्सा तथा चर्पीसहितको आधुनिक भवन निर्माण गरिएको बताउनुभयो ।
ईलाका प्रहरी कार्यालय भोर्लेटरका प्रमुख प्रहरी निरिक्षक याम नारायण अर्यालका अनुसार दुई रोपनी क्षेत्रफलमा बनाइएको भवन आरसिसि फ्रेम स्टक्चर अबधारणामा र लोड बियरिङ्ग अबधारणामा शौचालय निर्माण गरिएको छ । नवनिर्मित भवन महिला र फरक क्षमता ब्यक्तिमैत्री रहेको उहाँले बताउनुभयो ।
विदुर–७ नुवाकोटको सुनामी–एस ए जेभीसँग तीन करोड १६ लाख ८८ हजार ५४ रुपियाँको लागतमा २०८० जेठ २१ गते सम्झौता भई प्रहरी चौकीको भवन निर्माण गरिएको जिल्ला प्रहरी कार्यालयका प्रमुख प्रहरी नायव उपरिक्षक निशान्त श्रीवास्तवले जानकारी दिनुभयो ।
उद्घाटन समारोहमा मन्तब्य राख्दै मध्यनेपाल नगरपालिकाका उपप्रमुख सिता गुरुङ, प्रमुख जिल्ला अधिकारी बुद्धबहादुर गुरुङ र मध्यनेपाल–२ का वडाअध्यक्ष पदमबहादुर थापाले नयाँ भवनबाट यस क्षेत्रका नागरिकले सर्वसुलभ शान्तिसुरक्षा र सेवा पाउने बताउनुभयो ।
