लमजुङ । बेसीसहर–चामे सडक निर्माणका सामाग्री चोरीमा संलग्न रहेको ठहर गर्दै जिल्ला अदालत लमजुङले चार जनालाई पाँच वर्ष कैद र विगो जरिवनाको फैसला सुनाएको छ ।
जिल्ला अदालत लमजुङका न्यायाधीस कृष्णप्रसाद पौडेलको आइतबारको इजलासबाट चार जनालाई कैद, विगो जरिवाना र एक जनालाई जरिवाना मात्रको आदेश भएको श्रेस्तेदार भेषराज पौडेलले जानकारी दिनुभयो ।
मस्र्याङ्दी गाउँपालिका–३, बुद्वबजारका सन्तोष परियार (सोनाम), काजी तामाङ, किरण तामाङ र बेसीसहर नगरपालिका–६ भलामखोलाका सुजन तामाङलाई कैद र विगो जरिवानाको सजाय सुनाइएको हो ।
श्रेष्तेदार पौडेलका अनुसार सन्तोष परियारलाई पाँच वर्ष तीन महिना कैद, ३० हजार जरिवना र दुई हजार दुईसय क्षतिपूर्ति तोकिएको छ । तामाङ त्रयलाई भने पाँच वर्ष कैद, २५÷२५ हजार जरिवना र दुई÷दुई हजार क्षतिपूर्ति तोकिएको छ ।
चोरी भएको सामाग्री किन्ने मस्र्याङ्दी गाउँपालिका–९ गैरीफाँटमा कबाडी संकलक बदबहादुर परियारलाई २५ हजार जरिवना र एकजार क्षतिपूर्ति तोकिएको श्रेस्तेदार पौडेलले बताउनुभयो ।
गत भदौ ३ गते बेसीसहर–चामे सडक निर्माण कम्पनी आशिष अनेष्ट जेभीको तारजाली, रड, फलाम लगायतका सामाग्री चोरी गरेर लैजादै गर्दा उनीहरु रङ्गेहात समातिएका थिए । बेसीसहर नगरपालिका–६ मालेबगरको गोदामबाट २ सय १० केजी जाली चोरेर मस्र्याङ्दी–९ गैरीफाँट र बगैंचामा रहेको कवाडी संकलन पसलमा बेचिएको भेटेपछि प्रहरीले पक्राउ गरेको थियो ।
करिव ३ लाख पर्ने सामान कवाडी सञ्चालक बलबहादुर परियारले ७ हजारमा किनेर लुकाएका थिए । सामान किनेर थोत्रा कागाज, प्याक र बोराले छोपेर लुकाएको अबस्थामा बरामद गरिएको थियो । चोरीमा संलग्नहरु पक्राउ परेपछि उनीहरु विरुद्ध आशिष अनेष्ट जेभीका सञ्चालक राधेश्याम देवकोटाले मुद्दा दायर गर्नुभएको थियो ।
