लमजुङ । लमजुङमा सामुदायिक तथा घरपालुवा कुकुर विरालोको बन्ध्याकरण अभियान सञ्चालन गरिएको छ ।
जिल्लाका दुई पालिकाले घरपालुला तथा सामुदायिक कुकुरको बन्ध्याकरण गरिसकेका छन् । मस्र्याङ्दी र क्ब्होँलासोँथर गाउँपालिकाले कुकुरहरुको बन्ध्याकरण गरेका हुन् । सामुदायिक (छाडा) कुकुरका कारण समस्या बढेपछि शिविर नै राखेर बन्ध्याकरण गरिएको हो । कुकुरलाई रेबिजविरुद्ध खोप समेत लगाइएको छ ।
मस्र्याङ्दी गाउँपालिकाको खुदीमा आयोजना गरिएको शिविरमा ५६ वटा कुकुर र एउटा विरालोको बन्ध्याकरण गरिएको पशु शाखा प्रमुख मधु न्यौपानेले जानकारी दिनुभयो । भेटेरिनरी अस्पताल तथा पशु सेवा विज्ञ केन्द्र लमजुङसँगको समन्वयमा शिविर आयोजना गरिएको न्यौपानेले बताउनुभयो ।
भेटेरिनरी अस्पतालका प्रमुख डा. सुनिल न्यौपानेसहितका पाँचजना चिकित्सक, पालिकाका प्राविधिक तथा कर्मचारीसहितको सहयोगमा शिविरमा कुकुर विरालोको बन्ध्याकरण गरिएको गाउँपालिका अध्यक्ष अर्जुन गुरुङले बताउनुभयो ।
यसैगरी क्ब्होँलासोथर गाउँपालिकाको मालिङमा सञ्चालन गरिएको शिविरमा ५१ वटा कुकुर र चारवटा विरालोको स्थायी बन्ध्याकरण गरिएको गाउँपालिका अध्यक्ष सूर्य गुरुङले जानकारी दिनुभयो ।
रेविज रोग नियन्त्रणका लागि राष्ट्रिय कार्यक्रम अन्र्तगत स्थानीय तहहरुसँग समन्वय गरेर कुकुर विरालोको बन्ध्याकरण शिविर सञ्चालन गरिएको भेटेरिनरी अस्पताल तथा पशु सेवा विज्ञ केन्द्र लमजुङका प्रमुख डा. सुनिल न्यौपानेले बताउनुभयो । न्यौपानेका अनुसार यो बर्ष बेसीसहर, मध्यनेपाल र सुन्दरबजार नगरपालिकामा पनि शिविर सञ्चालन गरिनेछ । गतबर्ष बेसीसहर नगरपालिका, मध्यनेपाल नगरपालिका र दोर्दी गाउँपालिकामा शिविर सञ्चालन गरिएको थियो ।
सरकारले सन् २०३० सम्म पशुहरुमा लाग्ने प्रमुख रोगहरु उन्मुलन गर्ने कार्यक्रम राखेकाले रेविज रोगको उन्मुलनका लागि यो कुकुर विरालोको बन्ध्याकरण अभियान सञ्चालन गरिदैँ आएको भेटेरिनरी अस्पताल तथा पशु सेवा विज्ञ केन्द्र लमजुङका प्रमुख न्यौपानेले बताउनुभयो ।
