लमजुङ । लमजुङको मस्र्याङ्दी गाउँपालिकाले स्थापनाको ७ वर्षपछि नयाँ प्रशासकीय भवनबाट सेवा प्रारम्भ गरेको छ । आइतबार मस्र्याङ्दी गाउँपालिका–८ भुलभुलेमा निर्मित प्रशासकीय भवनको उद्घाटनसँगै सेवा प्रवाह सुरु गरेको हो ।
नवनिर्मित भवनको नेपाल सरकारका प्रवक्ता, सञ्चार तथा सूचना प्रविधिमन्त्री पृथ्वीसुब्बा गुरुङले उद्घाटन गर्नुभयो । उहाँले स्थानीय सरकारले ठुला कामहरु भन्दापनि नागरिकलाई सर्वसुलभ सेवा दिनेगरि काम गर्नुपर्ने बताउनुभयो । उहाँले स्थानीय सरकारले शिक्षा, स्वास्थ्य, पर्यटन, कृषि उत्पादन, बजारीकरणका क्षेत्रमा काम गर्न सुझाव दिनुभयो ।
सो भवन शिलान्यास भएको १८ महिनामै भवन निर्माण सम्पन्न भएको हो । निर्वाचनको समयमा जनतासँग गरिएको प्रतिवद्धता अनुरुप एउटै भवनबाट सबै शाखाका सेवा प्रवाह गर्नेगरि प्रशासकीय भवन निर्माण गरिएको गाउँपालिका अध्यक्ष अर्जुन गुरुङले बताउनुभयो ।
प्रशासकीय भवनको पहिलो तल्ला अपाङ्गमैत्री रहेको छ भने भवनको संरचनामा नै बेसमेन्ट पार्किङको समेत सुविधा छ । भवनसँगैको भित्तोलाई सदुपयोग गरेर क्यान्टिन निर्माण गरिएको छ । २८ वटा कोठाको तीन तले भवनमा अध्यक्ष र उपाध्यक्षको छुट्टाछुट्टै कार्यकक्ष सहितको सचिवालय कक्ष, न्यायिक समितिको कार्यकक्ष, प्रशासकीय प्रमुखको कार्यकक्ष, पालिका अन्तर्गतका सबै विषयगत शाखाका छुट्टाछुट्टै कार्यकक्ष रहने छ ।
हाल गाउँपालिकाको भवन नहुँदा साविकको भुलभुले गाविस भवनमा गाउँपालिका कार्यालय, पञ्चविचार प्राविमा वडा कार्यालय र केही शाखा कार्यालय सञ्चालनमा रहेका थिए केहि शाखाहरु खुदिमा संचालन भईरहेको छ । प्रशासकीय भवन निर्माणपछि हाल शाखाहरु छरिएर रहँदा जनताले पाएको सास्ति हटेर एकैठाउँबाट सर्वसुलभ सेवा पाउने विश्वास गाउँपालिकाले लिएको प्रमुख प्रशासकीय अधिकृत अर्जुन चपाइँले बताउनुभयो ।
२०८२ जेठ २३ सम्म निर्माण सम्पन्न गर्नेगरि सम्झौता भएको भवनको २०८१ फागुन १५ गते अध्यक्ष गुरुङले शिलान्यास गरि निर्माण कार्यको प्रारम्भ गर्नुभएको थियो । भवन निर्माणको लागि संघीय सरकार स्थानिय पूर्वाधार कार्यालय र मस्र्याङ्दी गाउँपालिकाले ६०÷४० लागत बेहोर्ने गरि भ्याटसहित ५ करोड ९७ लाख ६६ हजार ७ सय ६ रुपैयाँमा भवन निर्माणका लागि सम्झौता गरिएको थियो ।
भवन निर्माणको काम शैलेन्द्र–जयज्योती–बौद्धनाथ जे.भीले गरेको थियो । २०८० जेठ २३ गते सम्झौता भई २०८२ जेठ २३ गते भित्र बनाइसक्ने गरी सम्झौता भएपनि तोकिएको समय अगावै भवन निर्माण गरेर हस्तान्तरण भएको ईन्जिनियर सुरेश गौतमले जानकारी दिनुभयो । तोकिएको समयभन्दा अगावै निर्माण सम्पन्न भएमा निर्माण कम्पनीलाई पुरस्कृत हुने र प्रोत्साहन रकम पाउने ब्यवस्था रहेको उहाँले बताउनुभयो ।
