लमजुङको सुन्दरबजार नगरपालिका वडा नं. ८ मा सामूहिक भोज खाएका व्यक्तिहरुमा देखिएको फूड पोइजनका कारण एक जनाको मृत्यु भएको छ ।
फुड पोइजनका कारण सुन्दरबजार नगरपालिका वडा नं. ९ बस्ने देवी परियारको अस्पताल लैजाँदै गर्दा बाटोमा मृत्यु भएको हो ।
सामूहिक भोजमा सहभागी भएकाहरु मध्ये १८ जना विरामी परेका छन् । उनीहरू उपचारका लागि सुन्दरबजारस्थित एचडिसिएस नमूना सामूदायिक अस्पताल भर्ना भएका छन् ।
सुन्दरबजार नगरपालिकाको वडा नं. ८ स्थित क्षेत्र बहादुर गुरुङको घरमा शुक्रबार बेलुका क्रिसमसको उपलक्ष्यमा सामूहिक भोजको आयोजना गरिएको थियाे । भोज खाने ३५ जना मध्ये १८ जना फुड पोइजनका कारण अहिले अस्पताल भर्ना भइसकेको एचडिसिएस नमूना सामूदायिक अस्पतालले जनाएको छ ।
शुक्रबार सामूहिक भोज खाएर घर गएका वडा नं. ८ र ९ का व्यक्तिहरु शनिबारदेखि विरामी पर्न थालेका थिए । घरमै साधारण उपचार गर्दा समस्या देखिएपछि उनीहरु शनिबार बेलुका अस्पताल पुगेका थिए । भोजमा सहभागी व्यक्तिहरु आइतबार विहानसम्म अस्पताल आइरहेका छन् ।
अस्पताल आएका विरामीहरुमा ज्वरो र झाडापखलाको समस्या देखिएको छ । भोजमा सहभागीहरुले भात, कालो दाल, कुखुराको मासु र मुलाको अचार खाएकाे बताएका छन् ।
