लमजुङको मध्यनेपाल नगरपालिका–१० को नेटास्थित गणेश मालिका माध्यमिक विद्यालयले जिल्लामै सबैभन्दा ठुलो धनराशीको पुरस्कार ब्यवस्था गरि बक्तृत्वकला प्रतियोगिता आयोजना गरेको छ ।
विद्यालयको बार्षिकोत्सवको अवसरमा आयोजित जिल्लास्तरीय वक्तृत्वकला प्रतियोगिताको ५० हजार रुपैयाँ राशीको पुरस्कार आदर्श बाल माध्यमिक विद्यालयका सन्देश पाण्डेले हात पारेका छन् ।
विद्यालयको ४४ औं बार्षिकोत्सवको अवसरमा आयोजित वक्तृत्वकला प्रतियोगितामा पाण्डेले जिल्लाभरका २१ प्रतियोगिलाई पछि पार्दै सो पुरस्कार जितेका हुन् ।
विद्याज्योति माध्यमिक विद्यालय की सलिना मजाकोटीले द्वितीय स्थान प्राप्त गरी ३० हजार रुपैयाँ जितिन भने आयोजक गणेश मालिका माध्यामिक विद्यालयकी कृतिका दुराले तृतीय स्थान प्राप्त गरी २० हजार रुपैयाँ पाइन भने सान्त्वना हुने सरस्वती माध्यमिक विद्यालयकी सोफिया वि.क.ले १० हजार पुरस्कार प्राप्त गरिन ।
विद्यालयका अनुसार प्रतियोगिताको मूल्यांकन गर्न पिएन क्याम्पस पोखराबाट प्राध्यापकहरु ल्याइएको थियो । प्रतियोगितामा इन्टरनेट बरदान कि अभिशाप र बैदेशिक रोजगार भन्दा स्वरोजगार नै ठिक भन्ने दुई शिर्षक उपलब्ध गराइएको थियो । दुईबटा शिर्षक मध्ये गोला प्रथाद्वारा प्रतियोगिताको समयमा कुन विषयमा बोल्ने भन्ने विद्यार्थीले छनौट गर्न पाउने गरी व्यवस्था गरिएको थियो ।
विद्यालयका प्रधानाध्यापक चन्द्रबहादुर बस्नेतकाअनुसार नेटा घर भई हाल काठमाण्डौं बस्ने सूर्यबहादुर गुरुङ र खेमबहादुर गुरुङले आफ्ना स्वर्गीय बाबुआमा मानबहादुर र मैत कुमारीको सम्झनामा १० बर्ष सम्मको लागि रनिङ शिल्डसहित वक्तृत्वकला प्रतियोगिता आयोजना गर्ने गरी पुरस्कारको ब्यवस्था गरेका हुन् ।
प्रतियोगिता संचालन गर्दा बाहिरी जिल्लाबाट मूल्यांकन गर्ने व्यक्तिहरु ल्याउने र उनीहरुलाई दिने पारिश्रमिक तथा कार्यक्रम व्यवस्थापन खर्च समेत उनीहरुले नै उपलब्ध गराउने छन् ।
