लमजुङबाट प्रतिनिधिसभा सदस्यमा नेकपा एमालेका उपमहासचिव पृथ्वीसुब्बा गुरुङ निर्वाचित भएका छन् । सत्ता गठबन्धनका उम्मेदवार नेकपा माओवादी केन्द्रका महासचिव देवप्रसाद गुरुङलाई ३ हजार १ सय ८८ मतले पराजित गर्दै एमाले उपमहासचिव गुरुङले प्रतिनिधिसभाको यात्रा तय गरेका हुन् ।
निर्वाचित गुरुङले ३४ हजार ९ सय ६९ मत पाएका छन् । प्रतिद्वन्द्वी गुरुङले ३१ हजार ७ सय ८१ मत पाएकाे मुख्य निर्वाचन अधिकृत शिवप्रसाद खनालले बताए । उनका अनुसार कूल १ लाख ३३ हजार ५ सय ५९ मतदाता रहेकोमा ८० हजार १ सय ९२ मत खसेको थियो । खसेको मतमध्ये प्रतिनिधिसभातर्फ २ हजार ३ सय ८४ मत बदर भएको छ ।
यस्तै राष्ट्रिय स्वतन्त्र पार्टीका धर्मराज केसीले ९ हजार २९ मत प्राप्त गरेका छन् । राष्ट्रिय प्रजातन्त्र पार्टीका बालचन्द्र श्रेष्ठले १ हजार २ सय ३१ मत पाएका छन् । मंगोल नेशनल अर्गनाइजेशनका विकास गुरुङले ४ सय ५७ मत, जनता समाजवादी पार्टी नेपालका नरेन्द्रबहादुर गुरुङले १ सय ४८ मत प्राप्त गरेका छन् ।
आमूल परिवर्तन मसिहा पार्टीका नन्दजङ गुरुङले ६० मत, नेपाली कांग्रेस (बीपी) का लक्ष्मीकान्त पौडेलले ४९ मत, राप्रपा नेपालका टकबहादुर गुरुङले ३३ मत, स्वतन्त्र उम्मेदवार चन्दन बस्यालले ३१ मत र नेपाल मजदुर किसान पार्टीका राजेन्द्रप्रसाद प्रजापतिले २० मत ल्याएका छन् ।
२०७४ को स्थानीय तह चुनावमा कांग्रेस–माओवादी केन्द्र तालमेल भइरहँदा लमजुङमा ‘बाम गठबन्धन’को सुरुवात भएको थियो । पछि केन्द्रीय स्तरमै पार्टी एकीकरण गर्नेगरी प्रतिनिधिसभा तथा प्रदेशसभा निर्वाचनमा देशभर तालमेल गर्दा देवप्रसाद गुरुङ एमालेको सहयोगमा प्रतिनिधि सभा सदस्यमा निर्वाचित भएका थिए । यसपटक कांग्रेसको सहयोगमा संविधानसभामा जाने उनको रहर पूरा हुन सकेन । २०७४ मा देव गुरुङको सहयोगी बनेका पृथ्वीसुब्बा गुरुङले अहिले तिनै देव गुरुङलाई हराउँदै ५ वर्षका लागि संसदको यात्रा तय गरे।
एमाले नेता पृथ्वीसुब्बा गुरुङ २०६४ मा तत्कालीन लमजुङ क्षेत्र नं. २ बाट एमालेका दिलबहादुर घर्तीलाई हराएर विजयी भएका र माओवादी केन्द्रका देवप्रसाद गुरुङले मनाङमा कांग्रेसका पाल्तेन गुरुङलाई हराएर सँगसँगै संविधानसभा प्रवेश गरेका थिए । मुलुकभर एमालेले चुनाव हारेर तेस्रो पार्टीमा खुम्चिँदा लमजुङमा भने पृथ्वीसुब्बा गुरुङले जितेका थिए । २०७४ को प्रतिनिधिसभा तथा प्रदेशसभा सदस्य चुनावमा लमजुङ प्रदेश (२) बाट विजयी गुरुङ गण्डकी प्रदेशको संस्थापक मुख्यमन्त्री बने ।
२०४८ को निर्वाचनमा ‘एक बाम–एक ठाम’ को नारा लिएर पृथ्वीसुब्बा गुरुङ लमजुङ क्षेत्र नं. २ बाट चुनाव लड्दा एमालेले केशवलाल श्रेष्ठको उम्मेदवार झिकेर तत्कालीन जनमोर्चाका तर्फबाट क्षेत्र नं. १ मा देवप्रसाद गुरुङलाई चुनाव लडाएका थिए । २०४८ मा चुनाव लडेका यी दुवै नेता अहिले ३ दशकपछि फरक–फरक पार्टीबाट आमने–सामने भएका थिए । २०७० को चुनावमा वैद्य पक्षमा लागेर देवप्रसाद गुरुङले चुनाव बहिस्कार गर्दा पृथ्वीसुब्बा गुरुङ कांग्रेसका चन्द्रबहादुर गुरुङसँग हारेका थिए ।
संसदीय राजनीतिमा पृथ्वीसुब्बा गुरुङले सातौंपटक चुनाव लड्दा यो समेत गरी ३ पटक संसद् प्रवेश गर्ने भएका छन् । देवप्रसाद गुरुङले चौथोपटक चुनाव लड्दा यसपटकसहित २ पटक हारेका छन् । २ पटक जितेका छन् ।
मर्स्याङ्दीमा आठ कक्षासम्म स्थानीय पाठ्यपुस्तक
लमजुङ । लमजुङको मस्र्याङ्दी गाउँपालिकाले आधारभूत तहमा अध्यापनका लागि स्थानीय पाठ्यपुस्तक निर्माण गरेको छ । कक्षा १ देखि ८ सम्मका...
