लमजुङ । लमजुङे गायिका लक्ष्मी तामाङले जम्बुलिङ इन्टरनेशनल अवार्ड २०२२ प्राप्त गरेकी छन् ।
गायिका तामाङको चाइना जुत्ता गीतले जम्बुलिङ इन्टरनेशनल अवार्ड जित्न सफल भएको हो । तामाङ सँस्कृतिमा आधारित म्हेन्दोमाया गीत चाइना जुत्तालाई मलेसियाको केएलस्थित एनआरएन भवनमा भएको कार्यक्रममा अवार्ड प्रदान गरिएको हो ।
त्यसैगरि लाइफ टाइम अचिभमेन्ट अवार्ड अभिनेता उत्तम केसीले पाएका छन् । कार्यक्रममा ३० वटा विद्यामा अवार्ड प्रदान गरिएको जम्बुलिङ फिल्मस् प्रा.लि. का प्रवन्ध निर्देशक राजकिङ वाईवाले जानकारी दिए । राजसिंह वाईवाको अध्यक्षतामा भएको कार्यक्रममा जीएफएनका संस्थापक एवं जसपाका केन्द्रीय सदस्य डा. भिमलाल तामाङको विशेष उपस्थिति थियो ।
कार्यक्रममा एनआरएन मलेसियाका उपाध्यक्ष हेमराज सापकोटा, आदिवासी जनजाती महासंघ मलेसियाका अध्यक्ष विपीन राई, नेपाल तामाङ घेदुङ मलेसियाका उपाध्यक्ष विक्रम वाईवा तामाङ लगायतको विशेष उपस्थिति रहेको थियो ।
करिव आठवर्ष अघिदेखि सांगितिक यात्रा शुरु गरेकी तामाङले पहिलो पटक आफ्नै शव्द रचना र चर्चित संगितकार तिलक बम मल्लको संगितमा हाँसेर खेलेको डाडा मैले गाएर नाचेको पाखा भन्ने गीतमा स्वर दिएकी हुन् । तामाङले सांगीतिक यात्राको क्रममा ‘तिमिलाई माया गर्ने हरु’, ‘शंका तिम्रो कति कति’ जस्ता आधुनिक गीत बजारमा ल्याएकी थिईन भने दर्जनौ लोक तथा दोहोरी गितहरुमा स्वर दिएकी छन् ।
उनकनो डम्फुको ताक्धुमले पनि औद्योगिक शान्ती नेपाल म्युजिक अवार्ड अन्ततर्गत सर्वोत्कृष्ट साँस्कृतिक गीत अवार्ड र २०७४ सालमा बक्स अफिस अवार्ड पाएको थियो ।
तामाङको पछिल्लो गीत चाईना जुत्ताले नेपाली आर्ट कल्चर एन्ड म्युजिक अवार्ड २०७८ र निम अवार्ड पाएको थियो ।
