काठमाडौं : निर्वाचन आयोगले प्रतिनिधि सभा र प्रदेश सभा सदस्य निर्वाचनका लागि कार्यतालिका स्वीकृत गरेको छ। आयोगले प्रत्यक्ष (पहिलो हुने निर्वाचित हुने प्रणाली) तर्फको निर्वाचनका लागि प्रतिनिधि सभा र प्रदेश सभा सदस्यको उम्मेदवारी दर्ता असोज २३ गते हुने कार्यतालिका बनाएको हो।
आयोगले निर्वाचनको तयारी र व्यवस्थित गर्न आन्तरिक प्रयोजनका लागि कार्यतालिका स्वीकृत गरेको हो। सरकारले मंसिर ४ गते एकै चरणमा हुने गरी प्रतिनिधि सभा र प्रदेश सभाको निर्वाचन घोषणा गरेको छ।
प्रत्यक्ष र समानुपातिक निर्वाचन प्रणालीतर्फको निर्वाचनमा भाग लिन २०७९ साउन १९ गतेसम्म दर्ता कायम रहेका राजनीतिक दललाई साउन २२ गतेदेखि ३१ गतेसम्म दल दर्ताका लागि निवेदन दिन सूचित गरिसकेको छ। राजनीतिक दलसम्बन्धी ऐनबमोजिम दुई वा दुईभन्दा बढी दलले एकल चुनाव चिह्न लिइ निर्वाचनमा भाग लिने प्रयोजनका लागि राजनीतिक दलसम्बन्धी नियमावली बमोजिमको ढाँचामा निवेदन दिनुपर्ने आयोगद्वारा जारी सूचनामा उल्लेख छ।
निर्वाचन आयोग स्रोतका अनुसार असोज ११ गते निर्वाचन अधिकृतको नियुक्ति, २१ गते कार्यालय स्थापना, २३ गते उम्मेदवारी दर्ता, २८ गतेबाट मतपत्र छपाई, कार्तिक १६ गते देखि मतदान सामाग्री ढुवानी, मंसिर १ गतेदेखि मौन अवधि र ४ गते बिहान ७ बजेदेखि बेलुका ५ बजेसम्म मतदान गर्ने कार्यतालिका स्वीकृत भएको छ।
प्रत्यक्षतर्फ १६५ प्रतिनिधि सभा, ३३० प्रदेश सभा सदस्य पदका लागि ७७ जिल्लामा मुख्य निर्वाचन अधिकृतको कार्यालय र ८८ स्थानमा निर्वाचन अधिकृतको कार्यालय स्थापना हुनेछन्।
यसैगरी समानुपातितर्फको निर्वाचनका लागि साउन ३० गते कार्यालय स्थापना गरिने छ। आयोगले भदौ २० गतेबाट समानुपातिकतर्फको मतपत्र छपाई सुरु गर्ने, असोज २ र ३ गते बन्द सूची पेश गर्ने कार्यतालिका छ।आयोगले औपचारिक रुपमा कार्यतालिका भने सार्वजनिक गर्न बाँकी रहेको छ। आयोगले राजपत्रमासमेत कार्यतालिकाको सूचना प्रकाशित गर्नेछ।
