लमजुङ । सदरमुकाम बेसीसहरमा मापदण्ड विपरीत औषधि पसल (फार्मेसी) सञ्चालनमा रहेको पाइएको छ । जिल्ला अनुगमन समितिले गरेको अनुगमनको क्रमा अधिकांश औषधि पसलहरु मापदण्ड विपरीत रहेको पाइएको हो ।
जिल्ला प्रशासन कार्यालयको नेतृत्वमा बेसीसहरको ठाडोलाइन र शेराबजारमा रहेका औषधि पसलमा गरिएको अनुगमनमा फार्मेसी नै नपढेका ब्यक्तिले औषधि विक्री गरिरहेको पाइएको छ । त्यतिमात्र हैन, खाद्यपुरक सामाग्री, औषधिका रुपमा दर्ता नै नभएका सामाग्री समेत बेचविखन गरेको र इजाजत विना कम्युटर विलिङ गरेको पाइएको सहायक प्रमुख जिल्ला अधिकारी थम्मन सिंह गौतमले जानकारी दिनुभयो ।
“अनुगमनमा दक्ष जनशक्ति विनै औषधि बेचेको पाइएको । दर्ता नभएका औषधि र खाद्यपुरक सामाग्रीपनि बेचेको पाईयो”, गौतमले भन्नुभयो, “त्यस्ता पसललाई सातदिन भित्र सुधार गर्न निर्देशन दिइएको छ ।” तोकिएको समयमा सुधार नभए कानुन बमोजिम कारबाही गरिने गौतमले बताउनुभयो ।
जिल्ला प्रशासन कार्यालय, प्रदेश जनस्वास्थ्य कार्यालयका प्रतिनिधि, जिल्ला अस्पतालका चिकित्सक, करदाता सेवा कार्यालयका प्रमुख, बेसीशहर नगरपालिका, पर्यटन तथा उद्योग कार्यालय, लमजुङ उद्योग वाणिज्य संघका प्रतिनिधि, सुरक्षाकर्मी, सञ्चारकर्मीसहितको अनुगमन टोलीले सोमबार विभिन्न १० वटा औषधि पसलको अनुगमन गरेको थियो ।
अनुगमन टोलीले औषधि पसलहरु दर्ता, नवीकरण भए नभएको, विलविजक, साइनबोर्ड, सरसफाइ, अनुमतिप्राप्त व्यक्तिबाट औषधि विक्रि वितरण भए नभएको तथा तोकिएको मापदण्ड अनुसार चले नचलेको विषयमा अनुगमन गरेको थियो ।
नागरिकको स्वास्थ्यसँग प्रत्यक्ष जोडिएको औषधि पसलको अवस्था बुझ्न गरिएको अनुगमनमा अधिकांश औषधि पसल संचालकहरुले सरसफाईमा ध्यान नदिएको तथा पसल सञ्चालनको अवस्था सन्तोषजनक नरहेको अनुगमन टोलीले जानकारी दिएको छ ।
बेसीसहरमा करिब दुई दर्जन हाराहारीमा औषधि पसलहरु रहेका छन् । अधिकांश पसलहरु मापदण्ड विपरीत रहेपनि अनुगमनलाई प्रभावकारी बनाउन नसक्दा र कानुन विपरीत सञ्चालनमा रहेका पसललाई कारबाही हुन नसक्दा सेवाग्राहीहरु समस्यामा पर्नेगरेको जनगुनासो रहँदै आएको छ ।
