लमजुङ । लमजुङको राइनास नगरपालिकाको वडा नं. ५ तीनपिप्लेलाई छुवाछुतमुक्त बनाउन सबै सरोकारवालाहरुबाट सर्वाजनिक प्रतिबद्धता गरिएको छ । वडाका सबै समुदाय एकजुट भएर समानता र कानुनी चेतना, भेदभाव रहित समाज निर्माणमा प्रतिबद्धता जनाएका हुन् ।
सो वडामा तीनसय ७६ घरधुरी छन् । २०७८ को जनगणना अनुसार एक हजार छ सय ५१ जनसंख्या छ । ब्रामण, क्षेत्री, नेवार, कुमाल, गन्धर्व, परियार, विश्वकर्मा, सार्कीलगायतका जातजातीको बसोबास रहेको छ । विभिन्न चरणमा टोल–टोलमा पुगेर गरिएका छलफल तथा अन्र्तक्रियाले सार्थकता पाएपछि छुवाछुतमुक्त वडा कार्यान्वयन गर्न सफल भएको वडाअध्यक्ष शंखबादुर सार्कीले बताउनुभयो ।
“छुवाछुतमुक्त वडा कार्यन्वयनका लागि सबै समुदायले सार्वजनिक प्रतिबद्धता जनाउनुभएको छ”, वडा अध्यक्ष सार्कीले भन्नुभयो, “सबै समुदायका नागरिकहरु कार्यन्वयनका लागि झाँकी ¥यार्लीसहित गाउँ परिक्रमा पनि गर्नुभयो, यो खुसीको कुरा हो ।”
राइनास नगरपालिका प्रमुख खड्ग बहादुर गुरुङले सबैको प्रतिबद्धता आउनसके पालिकालाई नै छुवाछुत मुक्त बनाउन सकिने बताउनुभयो । उहाँले आगामी दिनहरुमा अन्य वडाहरुलाई छुवाछुत मुक्त बनाउँदै सिङ्गो पालिकालाई नै घोषणा गर्ने अभियानमा आफुँहरु रहेको बताउनुभयो ।
छुवाछुत मुक्त कार्यन्वयनका लागि पालिकास्थित सबै राजनीतिक दल तथा सामाजिक ब्यक्तित्वहरुले पनि प्रतिबद्धता जनाउनुभएको छ । २१ औं सताब्दीमा पनि छुवाछुत तथा जातीय भेदभाव रहिरहँदा समाज अगाडी बढ्न नसक्ने उहाँहरुले बताउनुभयो ।
नगरपालिकाका पुर्व नगरप्रमुख सिंहबहादुर थापा, वार इकाई लमजुङका अध्यक्ष कृष्णप्रसाद अधिकारी, नेपाली काँग्रेसका नगर सभापति श्रीकृष्ण पौडेल, नेकपा (एमाले) का नगर कमिटी अध्यक्ष बलराम घिमिरे र नेकपा माओवादी केन्द्रका नगर कमिटी अध्यक्ष प्रमोद दवाडीले सबैको प्रतिबद्धाले जातीय विभेद र छुवाछुतको अन्त्य गर्न सकिने बताउनुभयो । उहाँहरुले ब्यवहारिक रुपमा कार्यान्वयन गर्न सबैलाई आग्रह गर्नुभयो ।
जातिय छुवाछुत मुक्त वडा कार्यान्वयनका लागि प्रतिवद्धता जनाउँदै परियार समाजले पञ्चेबाजा, नेवार समुदायले लाखे नाँच, गन्र्धव समुदायले सारङ्गी बाजा, कुमाल समुदायले पाउदुरे नाँच प्रस्तुत गरेका थिए ।
