लमजुङ । चिटिक्क परेकाे जिउडाल । सदरमुकाम बेसीसहरकाे राम्रै खानदानी परिवार । त्यसमाथि गैरसरकारी संस्थामा जागिरे यी युवतीले सदरमुकाम बेसीसहरमा दिनदहाडै सुनका गहना चाेरी गर्लिन भनेर जाे काेहिलाई पत्याउन मुस्किल पर्छ ।
तर भयाे यस्तै । बेसीसहर बजारमा दिनदहाडै सुन चाेरेकाे आरोपमा बेसीसहर-८ शेराकी २७ वर्षिया युवती सुजा घिमिरे पक्राउ परिन । चाेरीमा उनी संलग्न देख्दा परिवार, छिमेकी र सहकर्मी दङ्गदास परेका छन् ।
एक गैरसरकारी संस्थाकाे कार्यालयमा रहेकै अबस्थामा भदाै १७ गते आइतबार दिउसाे पक्राउ परेकी घिमिरेले सुरूमा चाेरी स्विकार गर्न मानिनन । आफुलाई विना आधार पक्राउ गरेकाे भन्दै उनी प्रहरीसंग झाेक्किईन पनि । तर, केहिबेरमा प्रहरीले उनकाे घरबाट थुप्रै गहना बरामद गर्न सफल भयाे । अझ उनले केही गहना बैंकमा समेत राख्न भ्याएकाे प्रहरी स्राेतले बताएकाे छ ।
जिल्ला प्रहरी कार्यालय लमजुङका सुचना अधिकारी इन्सपेक्टर बुद्वी प्रसाद सुवेदीका अनुसार ती युवतीबाट सुनको रानीहार १ थान, सुनको बाला २ थान, सुनको रातो पत्थर जडित औँठी २ थान, सुनको औँठी २ थान, सुनको सिक्री १ थान, सुनको मिनिहार १ थान, सुनको टप ४ थान, सुनको पत्थर जडित टप २ थान, सुनको गणेशको मूर्ति लकेट १ थान र सुनको झुक्का २ थान बरामद गरेकाे छ ।
वैशाख २५ गते बेसीशहरको क्याम्पस रोडमा गंगाजमुना र साउन ३० गते न्यू ईरा बोर्डिङ नजिकै बालकुमारी घिमिरेकाे घरबाट करिब २३ तोला बराबरको सुन चोरी भएको थियो।
चोरी गर्ने कार्यमा संलग्न व्यक्तिहरुको खोजतलास एवं शंकित व्यक्तिहरुमाथि निगरानी राखी सुक्ष्म रुपमा अनुसन्धान गर्दै जाँदा घिमिरेलाई आइतबार पक्राउ गरिएको प्रहरी प्रमुख डिएसपी प्रकाश श्रीमलले बताए ।
घिमिरेलाई सोमबार लमजुङ जिल्ला अदालतबाट दिन ५ को म्याद थप अनुमति लिई चोरी सम्बन्धी कसूरमा थप अनुसन्धान भई रहेको प्रहरीले जनाएको छ ।
बेसीसहर बजार र आसपासमा बढ्दै गएकाे चाेरीका घटनाले नागरिकहरू चिन्तित थिए । अनुसन्धानमा काबिल डिएसपी प्रकाश श्रीमल र इन्सपेक्टर बुद्वी प्रसाद सुवेदीकाे मेहनत र शुष्म अनुसन्धानले चाेर पक्रिन सफल भयाे । यसले प्रहरीलाई सफलता मिल्याे भने नागरिकमा प्रहरी प्रतिकाे भराेसा थप बढ्याे ।
