लमजुङ । प्रेस चौतारी लमजुङले नेपाल पत्रकार महासंघ लमजुङ शाखाको कार्यालयमा बिहिबार तालाबन्दी गरेको छ । सदस्यता शुद्धिकरणका नाममा नेपाल पत्रकार महासंघको गण्डकी प्रदेश समितिले गरेको मनोमानी ढंगको सिफारिश प्रति असन्तुष्टि जनाउदै प्रेस चौतारी लमजुङले नेपाल पत्रकार महासंघ लमजुङ शाखाको कार्यालयमा बिहिबार तालाबन्दी गरेको हो ।
नेपाल पत्रकार महासंघ लमजुङले गठन गरेको कार्यदलको सिफारिशको निर्णयलाई जिल्लाबाट पठाइएको सदस्यहरुको नामावली उपर प्रदेश समितिले एकपक्षीय रुपमा, आस्थाका आधारमा प्रेस चौतारी निकट कयौँ सदस्यहरु तथा श्रमजीवी र व्यावसायिक पत्रकारहरुकोको नाम हटाएकोमा विरोध गर्दै प्रेस चौतारीले ज्ञापनपत्र पनि बुझाएको छ ।
प्रेस चौतारीद्वारा जारी बिज्ञप्तिमा प्रदेश समितिको निर्णयमा पत्रकारिता पेशामै क्रियाशील नभई अन्य पेशा व्यवसाय गर्दै आएकाहरुको नाम समावेश भएको हुँदा त्यस्तो कार्यप्रति घोर आपत्ति जनाउँदै उक्त निर्णय तत्काल सच्याउन जोडदार माग गरिएको छ । प्रेस चौतारी लमजुङका उपाध्यक्ष सुरज गुरुङ र सचिव सरोज विश्वकर्माद्वारा हस्ताक्षर गरिएको प्रेस विज्ञप्ती र ज्ञापनपत्र विहीबार नेपाल पत्रकार महासंघ लमजुङका उपाध्यक्ष अनुज अधिकारीलाई बुझइाएको छ ।
बिज्ञप्तिमा सक्रिय र व्यावसायिक प्रेस चौतारीमा आबद्ध कतिपय पत्रकारको सदस्यता नरहने गरी नेपाल पत्रकार महासंघ गण्डकी प्रदेश समितिले साउन १० गते आफ्नो वेवसाइटमा सार्वजनिक गरेको लमजुङ शाखाको सदस्यता नामावली उपर प्रेस चौतारी लमजुङको गम्भीर ध्यानाकर्षण हुनुका साथै उक्त निर्णयप्रति घोर आपत्ति र असहमति जनाईएको छ ।
प्रदेश समितिको उक्त निर्णय महासंघलाई पत्रकारितामा क्रियाशील संगठन प्रेस चौतारीविहीन बनाउने र गैरपत्रकारिता पेशामा आवद्धहरूको झुण्ड बनाउने खेल खेल्न लागिएको प्रष्ट हुन्छ । यो कार्य तत्काल रोक्न र प्रदेश समितिले र्सार्वजनिक गरेको नामावली सच्याउन हामी न्यायिक माग गर्दछौँ उक्त बिज्ञप्तिमा उल्लेख गरिएको छ ।
बिज्ञप्तिमा लमजुङबाट कार्यदलले गरेको सिफारिश कार्यान्वयन नभएकोमा अहिलेसम्म नेपाल पत्रकार महासंघ लमजुङ शाखाको धारणा नआउनु रहस्यमय रहेको उल्लेख गरिएको छ । उस्तै कर्ममा क्रियाशील अन्य संगठनमा आबद्धहरूले सदस्यता पाउने÷नवीकरण हुने र प्रेस चौतारीमा आबद्ध कतिपय सदस्यको सदस्यता÷ नवीकरण नहुँदा आफैँले पठाएको सिफारिशका सम्बन्धमा नेपाल पत्रकार महासंघ लमजुङ शाखालाई आफ्नो धारणा तत्काल सार्वजनिक गर्न उक्त विज्ञप्तिमार्फत आव्हान गरिएको छ ÷
ज्ञापनपत्रमा निर्णय नसच्चाएसम्म र पत्रकार महासंघ लमजुङले यस सम्बन्धमा चित्तबुझ्दो आधिकारिक धारणा सार्वजनिक नगरेसम्म प्रेस चौतारी नेपाल लमजुङले नेपाल पत्रकार महासंघ लमजुङ शाखामा अनिश्चितकालीन तालाबन्दी गरिएको उल्लेख गरिएको छ । उक्त कार्यको बोधार्थ नेपाल पत्रकार महासंघ गण्डकी प्रदेश समिति र नेपाल पत्रकार महासंघ केन्द्रीय समितिलाई समेत दिईएको छ ।
कार्यक्रमलाई सम्बोधन गर्दै प्रेस चौतारी गण्डकी प्रदेशका महासचिव आश गुरुङले जथाभावी र मनलाग्दी निर्णय गर्ने नेपाल पत्रकार महासंघ गण्डकी प्रदेश समितिको वर्तमान समिति भंग गर्नुपर्ने बताए ।
