लमजुङ । भारत सरकारले लमजुङको दोर्दी गाउँपालिका र मध्यनेपाल नगरपालिकामा नयाँ एम्बुलेन्स प्रदान गरेको छ । भारत सरकारले भारतीय दूतावासमार्फत गरेको एम्बुलेन्स सहयोग पालिकामा प्राप्त भएसँगै दुवै पालिकामा सो सेवा साउन १ गतेबाट सुरु भएको छ ।
दुवै पालिकालाई ख वर्गको एम्वुलेन्स प्रदान गरेको हो । दोर्दी गाँउपालिका अध्यक्षले उक्त एम्बुलेन्स मार्फत गाउँपालिका अन्र्तगत बासिन्दाले सहज र सर्वसुलभ तवरले प्रयोग गर्न पाउने वाताबरण सिर्जना गरिने बताए । उनका अनुसार गाँउपालिका भित्रका गर्भबती, सुत्केरी महिला, गरिबी, असहायहरूको लागि निःशुल्क सेवा प्रदान गरिने छ । एम्बुलेन्स प्राप्त गर्न सहजिकरणका लागि सहयोग गर्ने अर्चलबोट निवासी समाजसेवी पूर्णबहादुर कुँवर र भारत सरकार तथा भारतीय दूतावासलाई गाउँपालिकाले धन्यवाद दिएको छ ।
मध्यनेपाल नगरपालिकामा प्राप्त भएको एम्बुलेनस मध्यनेपाल नगरपालिका– १० को नेटा स्वास्थ्य चौकीको मातहातमा सञ्चालन गरिने नगरपालिकाको स्वास्थ्य शाखा प्रमुख सुर्यप्रसाद पौडेलले बताए । उनका अनुसार नगरपालिकाले नेटा स्वास्थ्य चौकीमा वर्थिङ सेन्टर सञ्चालनको तयारी गरेको छ । उक्त सेवालाई प्रभावकारी एवम् उपलब्धीपूर्ण बनाउन एम्वुलेन्स सेवा आवश्यक भएको हुँदा सञ्चालनमा ल्याइएको हो ।
मध्यनेपाल नगरप्रमुख रमेशकुमार पाण्डेले नागरीकलाई स्वास्थ्य सेवामा सहज बनाउन एम्बुलेन्सको व्यवस्था गरेको बताए । उनका अनुसार विशेष गरी नगरपालिका भित्रका गरीब, विपन्न, जेष्ठनागरिक र असक्त व्यक्तिहरूलाई सुलभ रुपमा सेवा प्रदान गरिने छ ।
भारत सरकारले नेपाल स्थित आफ्नो दुतावासमार्फत नेपालका विभिन्न जिल्लामा स्वास्थ्य तथा शिक्षाको क्षेत्रमा काम गर्ने विभिन्न संस्थालाई ३४ वटा एम्बुलेन्स र ५० वटा स्कुल बस सहयोग गरेको जनाएको छ ।
