लमजुङ । नेपाल पत्रकार महासंघ लमजुङका निवर्तमान अध्यक्ष एवं कान्तिपुर दैनिकका संवाददाता आश गुरुङलाई ‘कञ्चन पत्रकारिता पुरस्कार २०७९’ प्रदान गरिने भएको छ ।
नेपाल आदिवासी जनजाति पत्रकार महासंघ (फोनिज), गण्डकीद्वारा सञ्चालित ‘कञ्चन पत्रकारिता पुरस्कार–२०७९’ गुरुङलाई प्रदान गरिने भएको हो ।
लमजुङको क्होंलासोंथर गाउँपालिका वडा नं. ४ भुजुङमा जन्मिएका पत्रकार गुरुङले वि.सं. २०५९ सालबाट पत्रकारिता शुरु गरेका हुन् ।
पोखराबाट प्रकाशित हुँदै आएको तमू संसार त्रैमासिक पत्रिका र लमजुङको अन्तरंग साप्ताहिक पत्रिकाबाट पत्रकारिता शुरु गरेका गुरुङले स्थानीय र राष्ट्रिय गरि दर्जनौ सञ्चार माध्यममा काम गरिसकेका छन् । उनी प्रेस चौतारी नेपाल गण्डकी प्रदेश समितिको महासचिव समेत रहेका छन् ।
गीतकार समेत रहेका गुरुङले रचना गरेका ए ङोल्स्यो ए ङोल्स्यो, गलबन्दी चैस्यो ङोल्स्यो लगायतका गुरुङ गीत सार्वधिक चर्चित गीतको सुचीमा पर्न सफल भएको छ । गुरुङसंगै कास्कीका उदयबहादुर अमात्यलाई पनि पुरस्कार प्रदान गरिने भएको छ । पुरस्कार राशि जनही २५ हजार रुपियाँ र सम्मानपत्र रहेको छ ।
अधिवक्ता सुरेन्द्र थापामगर संयोजक रहेको प्रतिभा छनोट समितिको सदस्यमा पत्रकार एमबी आस्था मगर, शान्ति गुरुङ, रुद्र श्रीस मगर र धनबहादुर गुरुङ थिए । पुरस्कृत हुने आमात्य गण्डकी प्रदेशको एकमात्र नेपाल भाषा मासिक पत्रिका पोखरायाः भिन्तुनाका प्रकाशक तथा प्रधानसम्पादक हुन् । उनीहरुलाई साउन २७ मा पोखरामा पुरस्कृत गरिनेछ ।
पोखराका प्रतिष्ठित व्यवसायी बिमलमान गुभाजु र उनका परिवारले आफ्ना स्व. बावुआमा वेदमान गुभाजु र नेत्रकुमारी गुभाजुको स्मृतिमा सो पुरस्कार स्थापना गरेका हुन् । गण्डकी प्रदेशलाई कार्यक्षेत्र बनाई क्रियाशील २ पत्रकारलाई हरेक वर्ष सो पुरस्कार प्रदान गरिँदै आएको छ ।
