लमजुङ । लमजुङमा राजनीतिक दल निकटका शिक्षक नेताहरुले प्राथामिक तहका नवनियुक्त शिक्षकहरुलाई नियुक्तिपत्र वितरण गरेका छन् । शिक्षकहरुलाई राजनीतिबाट टाढा राख्नुपर्ने बहसलाई सो घटनाले चुनौति दिएको सरोकारवालाहरुले टिप्पणी गरेका छन् ।
शिक्षा विकास तथा समन्वय इकाई लमजुङले शिक्षक नेताहरुलाई बोलाएर नवनियुक्त शिक्षकहरुलाई नियुक्तिपत्र वितरण गर्न लगाएको हो । लमजुङमा स्थायी नियुक्तिका लागि सिफारिस भएका ४९ जना प्राथमिक तह तृतीय श्रेणीका शिक्षकहरुलाई स्थायी नियुक्तिपत्र वितरण गरिएको हो ।
नवनियुक्त शिक्षकहरुलाई नेपाली कांग्रेस निकट नेपाल शिक्षक संघका गण्डकी प्रदेश महासचिव शिवराज अधिकारी, नेकपा एमालेनिकट नेपाल राष्ट्रिय शिक्षक संगठनका जिल्ला अध्यक्ष हस्तबहादुर गुरुङ र नेकपा माओवादी केन्द्रनिकट एकीकृत अखिल नेपाल शिक्षक संगठनका अध्यक्ष झपेन्द्र न्यौपानेले पनि नियुक्ति पत्र वितरण गर्नुभएको थियो ।
यसअघि नवनियुक्त शिक्षकलाई जिल्ला शिक्षा समितिका सभापति वा प्रमुख जिल्ला अधिकारी वा शिक्षा विकास तथा समन्वय इकाई प्रमुख स्वयम्ले नियुक्तिपत्र वितरण गर्ने चलन थियो । शिक्षा विकास तथा समन्वय इकाई प्रमुख दिवाकर शर्माले पेशागत संघसंगठनलाई परिचयात्मक कार्यक्रमका लागि मात्रै बोलाइएको जिकिर गर्नुभयो ।
‘शिक्षकको नियुक्ति गर्ने दिनमा परिचय कार्यक्रम पनि राख्छौं । जिल्ला समन्वय प्रमुख र पेशागत संगठनका अधयक्षहरुलाई बोलाउने चलन रहेछ । बोल्ने होइन, परिचय दिनमात्र बोलाएको हो । चलिरहेको परम्परालाई तोड्न भएन त भएन नि’ उहाँले भन्नुभयो ।
सो कार्यक्रममा शिक्षा समितिका सभापति एवं समन्वय प्रमुख पूर्णबहादुर गुरुङ र प्रमुख जिल्ला अधिकारी बुद्धबहादुर गुरुङ व्यस्त रहेको बताउँदै कार्यक्रममा उपस्थित रहनुभएको थिएन् । अघिल्लो पटक निमावि तहका शिक्षकहरुलाई भने समन्वय प्रमुखले नियुक्तिपत्र वितरण गर्नुभएको थियो ।
