लमजुङ । मध्यनेपाल नगरपालिका–७ करापुटारमा आयोजित १४ औं करापुटार खुल्ला वडा स्तरीय पुरुष भलिबल प्रतियोगिताको उपाधि बिरुवा गाउँपालिका–२, स्याङ्जाले हात पारेको छ ।
चौध टिम सहभागि प्रतिस्पर्धात्मक खेलमा शुक्लागण्डकी नगरपालिका वडा–१०, तनहुँ दोस्रो स्थानमा रह्यो । विजेता टिमले नगद ५० हजार, शिल्ड, मेडल र प्रमाणपत्र प्राप्त गरे भने उपविजेताले नगद ३० हजार, शिल्ड, मेडल र प्रमाणपत्र हात पारे ।
प्रतियोगितामा व्यक्तिगत उत्कृष्टता देखाउने खेलाडीहरूलाई पनि पुरस्कृत गरिएको थियो । बिरुवा गाउँपालिका २, स्याङ्जाका कृष्ण राना सर्वोत्कृष्ट खेलाडी घोषित हुनुभयो । उत्कृष्ट स्पाइकरको उपाधि बिरुवा–२ कै विनायक थापाले पाउनुभयो भने उत्कृष्ट डिफेन्डर शुक्लागण्डकी–१०, तनहुँका विमल थापा मगर बन्नुभयो । उत्कृष्ट ब्लकरको उपाधि पनि शुक्लागण्डकी–१० कै प्रेम कुमालले जित्नुभयो । सर्वोत्कृष्ट खेलाडीलाई नगद ३ हजार, ट्रफी र प्रमाणपत्र प्रदान गरियो भने अन्य व्यक्तिगत विधाका विजेताहरूलाई जनही १ हजार, मेडल र प्रमाणपत्र प्रदान गरियो ।
विजयी टिम तथा उत्कृष्ट खेलाडीलाई पुरस्कार वितरण गर्दै मध्यनेपाल नगरपालिकाका प्रमुख रमेश कुमार पाण्डेले प्रतियोगिताले खेलकुदको प्रवद्र्धन गर्नुका साथै युवा खेलाडीहरूलाई क्षमता प्रदर्शन गर्ने अवसर प्रदान गरेको बताउनुभयो ।
आयोजक करापुटार युवा क्लबका अध्यक्ष तेज बहादुर तामाङले दर्शकहरूको उत्साहजनक सहभागिता रहेको प्रतियोगितालाई आगामी वर्ष थप व्यवस्थित र आकर्षक बनाउने बताउनुभयो ।
