लमजुङ । नेपाल सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले वर्तमान सरकार आगामी निर्वाचनसम्म सहज ढंगले रहिरहने बताउनुभएको छ । सरकार ढल्छ भनेर विपक्षी दलहरुबाट चलाइएको हल्ला निराधार भएको मन्त्री गुरुङले बताउनुभयो ।
शनिबार गृहजिल्ला लमजुङको दोर्दी–६, कृर्तिपुरस्थित भगवान आधारभुत विद्यालयको स्वर्ण महोत्सव समारोहको उद्घाटन गर्दै सञ्चारमन्त्री गुरुङले आफ्ना कार्यकर्ताहरुलाई भुलाउन विपक्षी दलहरुले सरकार ढल्ने हल्ला चलाएको बताउनुभयो ।
“साना पार्टीहरुले हल्ला चलाउँदैमा सरकार ढल्नेवाला छैन् । तत्काल केही हुनेवाला छैन् । यो प्रतिपक्षमा बसेका दलका नेताहरुले चलाएको हल्ला मात्र हो । कार्यकर्तालाई आफ्नो सरकार बन्छ, नआत्तिय भन्नलाई मात्र हो”, मन्त्री गुरुङले भन्नुभयो, “जबसम्म नेपाली काँग्रेसकासभापति शेरबहादुर देउवा र नेकपा एमालेका अध्यक्ष केपी शर्मा ओलीविच समझदारी भइरहन्छ, तबसम्म कसैलेपनि केही गर्न सक्दैन ।” उहाँले मुलुकमा अस्थिरता चाहने शक्तिले पनि सरकारबारे नकरात्मक हल्ला चलाएको बताउनुभयो ।
विगतदेखि नै मुलुकमा संकट पर्दा काँग्रेस र एमाले मिलेर पार लगाएको इतिहाँस रहेको मन्त्री गुरुङले बताउनुभयो । ०४६ सालदेखि आजसम्मको परिवर्तन आउनुमा काँग्रेस एमाले मिलेर नै सम्भव भएको उहाँले बताउनुभयोे । अहिलेपनि मुलुक संकटकै अबस्थामा रहेकोले दुई ठुला दलहरु मिलेर सरकार बनाउनुपरेको उहाँले प्रष्टाउनुभयो ।
“०७७ सालमा जब केपी शर्मा ओलीको एकल सरकार गि¥यो । त्यसपछि मुलुकमा जुन खालको अस्थिर खेलमा राजनीतिक दलहरु लागे, मुलुकको दुर्भाग्य त्यही दिनबाट सुरु भयो”, उहाँले भन्नुभयो, “त्यही दुभाग्यले गर्दा अहिलेपनि मुलुकको शासकीय अबस्था कमजोर बनिरहेको छ । साँढे १८ खर्ब बजेटमा तीन खर्ब विकास बजेटपनि खर्च हुन नसक्ने अबस्था छ । त्यसलाई सुधार गर्नका लागि, शासन प्रणालीमा सुधार गर्नका लागि यो सरकार बनेको हो ।”
उहाँले अबका दिनमा शासकीय क्षेत्रमा ब्यापक सुधार आवश्यक छ भन्ने कुरा छ महिना भित्र सरकारले महसुस गरको बताउनुभयो । उहाँले सरकारले ल्याएको नयाँ विधयकले पुराना नीति तथा ऐनहरु परिवर्तन भएकाले अबका दिनमा शासकीय प्रणालीमा ब्यापक सुधार आउने दावी गर्नुभयो । “विभिन्न १३ वटा पुराना कानुनहरुलाई सुधार गर्दै नयाँ अध्यादेस ल्याएका छौं”, उहाँले भन्नुभयो, “यो अध्यादेस भएपनि शासकीय प्रणालीमा सुधार हुन्छ । सुशासन कायम हुन्छ । उद्योग ब्यवसाय र अर्थतन्त्रमा देखिएको समस्यामा सुधार हुँदै जान्छ ।”
