लमजुङ । मर्स्याङ्दी गाउँपालिकाको प्रशासकीय भवन निर्माणकार्य सुरु भएको छ । भवनको गाउँपालिका अध्यक्ष अर्जुन गुरुङले सोमबार एक कार्यक्रमकाबीच औपचारिक रुपमा शिलान्यास गरेका छन् ।
स्थानीय तहको प्रशासकीय भवन पूर्वाधार विकास कार्यक्रम सञ्चालन कार्यविधि, २०७९ को दफा (११) को उपदफा (१) बमोजिम गाउँपालिकाको लागि संघीय सरकारको ६०/४० को अनुपातमा अनुदान उपलब्ध गराउन सक्ने प्रावधान रहेकाले ८ करोड ९७ लाख ९६ हजार ४ सय ७० रुपैयाँ ६९ पैसाको इस्टिमेट गरेर ठेक्का प्रक्रिया अघि बढाएको थियो ।
प्राविधिक र आर्थिक प्रस्तावमा सवै प्रक्रिया पूरा गरेर शैलेन्द्र–जयज्योति–बोद्धनाथ जेभीले २०८० जेठ २३ गते भ्याटसहित ५ करोड ९७ लाख ६६ हजार ७ सय ३ रुपैयाँ ९५ पैसामा सम्झौता गरेको छ । यसमा संघीय सरकारले ६० प्रतिशत र स्थानीय सरकारले ४० प्रतिशत लगानी गर्नेछ । निर्माण व्यवसायीले प्रशासकीय भवनको निर्माणकार्य २०८२ जेठ २३ गते भित्र सक्ने गरी सम्झौता गरेको प्रमुख प्रशासकीय अधिकृत गौतम पंज्ञानीले जानकारी दिए।
प्राविधिक शाखा प्रमुख ईन्जिनियर सुरेश गाैतमका अनुसार भवन बेशमेन्ट पार्किङ बाहेक ३ तल्ला रहने छन् । भवनमा कूल २५ वटा कोठा रहने उनले बताए । भवनमा अध्यक्ष र उपाध्यक्षको अलग–अलग कार्यकक्ष सहितको सचिवालय कक्ष, न्यायिक समितिको कार्यकक्ष, प्रशासकीय प्रमुखको कार्यकक्ष, पालिका अन्तर्गतका सबै विषयगत शाखाका अलग–अलग कार्यकक्ष, सेवाग्राही अपांगमैत्री ग्राउन्ड फ्लोर, बेशमेन्ट पार्किङलगायत रहनेछन् ।
प्रशासकीय भवन निर्माणपछि जनताले सर्वसुलभ तरिकाले सेवा पाउने विश्वास लिइएको गाउँपालिका अध्यक्ष गुरुङले बताए । भवन निर्माणकार्य समयमै सक्न निर्माण व्यवसायीलाई आग्रह गर्दै गाउँपालिकाको कार्यालय र जनप्रतिनिधिको तर्फबाट पूर्ण सहयोग र साथ रहने प्रतिवद्धता जनाए ।
पाँच दलीय गठबन्धन हराएका पीएससँग कांग्रेस र रास्वपा आमनेसामने
लमजुङ । १२ वर्षपछि राजनीतिक दलहरुविच एक्ला–एक्लै प्रतिष्प्रर्धा हुन लागेपछि लमजुङमा राजनीतिक माहोल गर्माएको छ । यसो त तीन वर्षअघि...
