नागरिकप्रति जवाफदेही बन्न मर्स्याङ्दी गाउँपालिकाकाे माघ ५ गते सार्वजनिक सुनुवाइ

लमजुङ । गाउँपालिकाले गरेको काम, कार्बाहीको बारेमा आम नागरिकहरूलाई जानकारी गराउने र पृष्ठपोषण संकलन गर्ने उदेश्यले मर्स्याङ्दी गाउँपालिकाले यही माघ ५ गते शुक्रबार सार्वजनिक सुनुवाइ कार्यक्रमको आयोजना गर्ने भएको छ ।

मर्स्याङ्दी गाउँपालिका ३ भुलभुलेको सामुदायिक भवनमा चालु आर्थिक वर्षको अर्धबार्षिकमा भए गरेका विकास निर्माण र सेवा प्रवाहसम्बन्धी सार्वजनिक सुनुवाइ आयोजना गर्न लागेको गाउँपालिकाका प्रमुख प्रशासकीय अधिकृत गौतम पंज्ञानीले जानकारी दिए। उनका अनुसार विकास निर्माणप्रति नागरिकको धारणा र सुझाव संकलनको लागि गाउँपालिकाले सार्वजनिक सुनुवाई आयोजना गर्न लागेको हो ।

गाउँपालिका अध्यक्ष अर्जुन गुरुङले सार्वजनिक निकायबाट दिइने सेवा, सुविधा, बस्तु तथा संचालन हुने कार्यक्रमको प्रभावकारिता, गुणस्तरीयता, पारदर्शिता र जवाफदेहिता कायम गर्न सार्वजनिक सुनुवाइ कार्यक्रम फलदायी हुने बताए । सार्वजनिक सुनुवाई जवाफदेहिताको महत्वपूर्ण औजार रहेकाले नागरिकसँग दोहोरो संवाद स्थापित गर्न, गाउँपालिकाको समग्र विकासबारे नागरिकले बुझ्न पाउने र नागरिकको रचनात्मक प्रतिक्रिया पाउने भएकाले यसबारे आगामी योजना निर्माण तथा विकास तथा समृद्धिमा थप सहयोग पुग्ने विश्वास गरिएको छ ।

अध्यक्ष गुरुङले नागरिकको सहभागिताबाट थप पारदर्शीता, विकास निर्माण र सेवाप्रवाहलाई गुणस्तरीय तथा प्रभावकारी बनाउँदै जिम्मेवारीको संस्कार बसाउन सार्वजनिक सुनुवाइ गर्न लागिएको बताए ।

सार्वजनिक सुनुवाइ कार्यक्रममा सहभागिताको लागि गाउँपालिकाले सरोकारवाला, राजनीतिक दल, सरकारी तथा गैरसरकारी संस्था, युवा क्लब, आमा समूह, बुद्धिजीवी वर्ग एवं सवै नागरिकलाई अनुरोध गरेको छ ।

गाउँपालिकाले चालु आर्थिक वर्षमा ३ पटक सार्वजनिक सुनुवाइ गर्ने योजना अघि सारेको छ ।