लमजुङको मर्स्याङ्दी गाउँपालिकामा प्लास्टिकका प्लेट, गिलास र चम्चा प्रयोगमा प्रतिबन्ध लगाइएको छ । गाउँपालिकाको जेठ २५ गते बसेको कार्यपालिका बैठकले प्लास्टिकका सामाग्री प्रयोगमा पूर्ण रूपमा प्रतिबन्ध लगाएको अध्यक्ष अर्जुन गुरूङले जानकारी दिए ।
´सफा मर्स्याङ्दी अभियानलाई सार्थक बनाउन प्लास्टिकजन्य वस्तुको प्रयोगलाई न्युनिकरण गर्न यस्तो निर्णय गरेका छौं´, अध्यक्ष गुरूङले भने, `प्लास्टिकका भाँडाको विकल्पमा दुना टपरी र स्टिलका भाँडा प्रयोगमा प्रोत्साहन गर्छौं ।´
निर्णय कार्यान्वयन गर्न पालिकाले जेठ ३२ गते सार्वजनिक सूचनासमेत जारी गरेको छ । मर्स्याङ्दी गाउँपालिकाले चालू वर्षमा ‘सफा मर्स्याङ्दी’अभियान सञ्चालन गरिरहेको छ । अभियान अन्तर्गत गाउँपालिकाले सवै गाउँटोल, बस्ती, बाटोघाटो सरसफाई अभियान चलाउनुको साथै फोहोर संकलन र वर्गीकरण कार्य गरेको छ । गाउँबस्तीमा पुगेर ट्याक्टरबाट फोहोर संकलन गरि वर्गीकरण गरेर व्यवस्थापन गर्ने गरेको मर्स्याङ्दी गाउँपालिकाका उपाध्यक्ष जुनामाया थापाले बताइन्।
अभियानलाई सफल बनाउन गाउँपालिकाको हरेक टोल बस्तीहरु, संघ संस्थाहरु वरपर, सार्वजनिक स्थलहरु र खोलाहरुको सरसफाई गरिएको छ । पालिकासंगै स्थानीय पनि लागि गरेका छन् । यो अभियानले गाउँटोल सफा र आफूहरूलाई उत्साहित बनाएको स्थानीय बउँछन् ।
गाउँपालिकाले २०७६ असोजदेखि फोहोर संकलन अभियान सञ्चालन गरी जथाभावी फोहर फाल्न प्रतिबन्ध लगाएको थियो । त्यतिबेलादेखि मर्स्याङ्दी नदीलाई केन्द्रमा राखेर सफा मर्स्याङ्दी अभियान सुरु गरिएकोमा अहिले गाउँपालिकालाई नै सफा बनाउने अभियानमा गाउँपालिका जुटेको हो । सफा मर्स्याङ्दी अभियानले फोहोरबाट हुने रोग नियन्त्रणमा सहयोग पुग्ने स्वास्थ्य शाखा प्रमुख लुल घलेले बताए ।
मर्स्याङ्दी गाउँपालिकाले फोहर जथाभावि नफाल्न गाउँगाउँमा डस्टवीनको व्यवस्थापन गरेको छ । फोहर संकलन गरी प्रशोधन गरेर विक्री गरी आम्दानी समेत गरिएको गाउँपालिकाले जनाएको छ । यसका लागि गाउँपालिकाले आफैं ट्याक्टर खरिद गरेर फोहोर संकलन क्यालेन्डर बनाएर गाउँगाउँबाट फोहर संकलन गर्दै आएको प्रमुख प्रशासकीय अधिकृत ताराबहादुर तामाङले बताए ।
प्लास्टिकले वातावरणसँगै मानव स्वास्थ्यमा हानी गर्ने हुनाले प्लास्टिक प्रतिस्थापन गर्न उपभोक्ताहरू जागरुक हुनुपर्नेमा गाउँपालिकाले जोड दिएको छ ।
