लमजुङ । राष्ट्रिय विभूति बीर भक्ति थापाले बालापनमा गाईबस्तु चराएको र छेलो हानेको हर्सिङडाँडामा छेलो प्रतियोगिता राखिएको छ ।
बीर भक्ति थापा जन्मस्थल संरक्षण संवद्र्धन तथा विकास समितिले बैशाख ६ गते हर्सिङडाँडामा छेलो, नृत्य र डोरी तान्ने प्रतियोगिता आयोजना गरेको हो । खुला पुरुष छेलो प्रतियोगितामा प्रथम हुनेलाई नगद ५ हजार र पगरी रहेको छ भने द्धितिय हुनेलाई नगद ३ हजार र पगरीको ब्यवस्था गरिएको छ ।
सोही स्थानमा खुला आमा समूह सामुहिक नृत्य प्रतियोगिता पनि राखिएको छ । प्रतियोगितामा प्रथम हुनेलाई नगद १० हजार, द्धितियलाई नगद ५ हजार र तृतियलाई नगद ३ हजार ब्यवस्था गरिएको छ । सोही क्रममा मस्र्याङ्दी गाउँपालिकाको वडा नं. ३ को टोलस्तरीय पुरुष डोरी तान्ने प्रतियोगिता पनि राखिएको छ । प्रतियोगितामा प्रथम हुनेलाई ५ हजार र द्धितिय हुनेलाई ३ हजार पुरस्कार ब्यवस्था गरिएको आयोजक समितिका सदस्य रवि थापाले जानकारी दिए ।
लमजुङको मस्र्याङ्दी गाउँपालिका वडा नं ३ मा रहेको हर्सिङडाँडा उत्कृष्ट पर्यटकीय गन्तव्यका रुपमा विकसित हुन थालेको छ । हर्सिङडाँडामा आन्तरिक पर्यटक घुमफिर र बास बस्नसमेत आउन थालेपछि यो क्षेत्र पर्यटकीय गन्तव्यका रुपमा विकसित गर्न लागिएको समितिका अध्यक्ष प्रेमबहादुर बस्नेतले बताए ।
ऐतिहासिक एवं पर्यटकीय स्थल हर्सिङडाँडामा पर्यटकको आगगमन बढ्न थालेको र यहाँ आउने पर्यटकहरु रात विताउने र क्यामफायर गरेर रमाउने गरेको स्थानीय पर्यटन व्यवसायी पूर्णबहादुर गुरुङले बताए ।
यहाँबाट मस्र्याङ्दी गाउँपालिकाको पर्यटकीय गाउँ सिउरुङ, भुस्मे, ढंगै, घनपोखरा, सिम्पानी, खुदीलगायत अधिकांश ठाउँ अवलोकन गर्न सकिन्छ । त्यस्तै, स्मार्ट भिलेज घलेगाउँ, कल्मेडाँडा, बेँसीसहर बजार, मस्र्याङ्दी र खुदीखोलाको नागबेली, डा. हर्क पिक हिमाल, मनासलु रेन्ज, बुद्ध हिमाललगायत अवलोकन गर्न सकिन्छ ।
समुन्द्री सतहबाट २ हजार २ सय ८४ मिटर उचाईमा रहेको यो ठाउँमा बेसीसहरदेखि खुदी हुँदै करिब २० किलोमिटरको यात्रामा पुग्न सकिन्छ । खुल्ला समथर भुभाग, चारैतिरको दृश्यावलोकन गर्न सकिने, नजिकै देखिने मनोरम हिमशृखला, मस्र्याङ्दी भ्याली यसको मुख्य आकर्षणहरु रहेको मस्र्याङ्दी गाउँपालिकाका अध्यक्ष अर्जुन गुरुङले बताए । पर्यटकीय स्थल हर्सिङडाँडा पुग्ने सडक स्तरउन्नतीलगायतका काममा गाउँपालिकाले सहयोग गरिरहेको छ ।
विसं १८०२ मा खुदीको ढंगैबँेसीमा जन्मिएका बीर भक्ति थापाको हर्सिङडाँडामा छेलो हानेको ठाउँ, गोठ राखेको ठाउँ, गोठमा पकाएर खाने गरेको ओदानलगायत छन् । अन्नपूर्ण पदमार्ग अन्र्तगत पर्ने हर्सिङडाँडामा स्थानीय युवाहरुले ‘हर्सिङ कम्यूनिटी क्याम्प साइट’ सञ्चालनमा ल्याएका छन् ।
