लमजुङको मस्र्याङ्दी गाउँपालिका–३ मा पर्ने होमस्टे गाउँ सिउरुङमा बैशाखको दोस्रो साता १२ औँ सिउरुङ महोत्सव हुने भएको छ ।
सिउरुङमा प्रत्येक वर्ष महोत्सव गरिँदै आएकोमा कोरोना संक्रमण जोखिमपछि महोत्सव हुन सकेको थिएन । यही बैशाख ७ गतेदेखि ९ गते सम्म विविध कार्यक्रमको आयोजना गरी सिउरुङ महोत्सवको आयोजना गरिने १२ औंँ सिउरुङ महोत्सव मूल आयोजक समितिका संयोजक नन्दबहादुर घलेले जानकारी दिए ।
उनका अनुसार ग्रामीण होमस्टे प्रवद्र्धन, स्थानीय कला संस्कृतिको संरक्षण र सम्वद्र्धन साथै स्थानीयस्तरमा उत्पादित घरेलु उत्पादनको प्रबद्र्धनका लागि महोत्सव आयोजना गर्न लागिएको हो ।
महोत्सवमा स्थानीय खाना महोत्सव, संस्कृति प्रदर्शनी, राष्ट्रिय तथा स्थानीय कलाकारहरुको साँस्कृतिक प्रस्तुति रहनेछ । प्राकृतिक दृश्यावलोकन, गुम्वा, तमू संग्रहालय, क्व्होइँबो, शिलादेवी मन्दिर, जलदेवी मन्दिर, कन्यादेवी मन्दिरलगायतको दर्शन गर्न सकिने महोत्सव आयोजक समितिले जनाएको छ ।
महोत्सवमा कृषि, जडीबुटी, चोयाबाट निर्मित भकारी, डोको, स्याखु, चर्खा, झोला, पछ््यौरालगायत ऊन र धागोबाट निर्मित हस्तकला सामग्रीको प्रदर्शन समेत गरिने महोत्सव मूल आयोजक समितिका सचिव पूर्णसिंह गुरुङले बताए । उनका अनुसार महोत्सवमा ख्यातिप्राप्त कलाकारहरु राजु गुरुङ, लक्ष्मी खड्का, जादुगर शेरबहादुर गुरुङ, कलाकार केशबहादुर गुरुङ, प्रिया गुरुङलगायतको प्रस्तुति रहने छ ।
महोत्सवमार्फत समुद्री सतहदेखि ३ हजार मिटर उचाइमा रहेको खेलापु डाँडालाई भ्यु प्वाइन्टको रुपमा विकास गर्ने लक्ष्य राखिएको छ । २०६२ सालदेखि ग्रामीण पर्यटन प्रवद्र्धनको थालनी भएको सिउरुङमा प्रत्येक वर्ष स्थानीय पर्वको रुपमा महोत्सव आयोजना गरिँदै आएको थियो । कोरोनाका कारण नियमित हुन नसकेको महोत्सवले अव निरन्तरता पाउने संयोजक घलेले बताए ।
समुद्री सतहदेखि करिब १ हजार ८ सय ५४ मिटरको उचाइमा रहेको पर्यटकीय गाउँ सिउरुङमा गुरुङ जातिको बस्ती छ । विभिन्न हिमशृंखलाको दृश्यावलोकन, प्राकृतिक सुन्दरता, संस्कृति, स्थानीय बासिन्दाको हार्दिकता, आत्मियता र पाहुना सत्कार सिउरुङ गाउँको विशेषता रहेको छ ।
कूल १ सय २० घर रहेको सिउरुङको १७ घरमा होमस्टे संचालन गरिएको छ । लमजुङ सदरमुकाम बेंसीसहरदेखि २४ किलोमीटर उत्तरपश्चिममा पर्ने सिउरुङ बेंसीसहरदेखि खुदी, ढगैं हुंदै करिव २ घण्टामा मोटर चढेर पुग्न सकिन्छ ।
