लमजुङ जिल्लाका आठबटै पालिकाहरुमा विशेष रुपमा हात्तीपाईले विरुद्धको औषधी खुवाउने कार्यक्रम शुरुवात भएको छ । सुन्दरबजार नगरपालिकामा नगर प्रमुख कृष्ण प्रसाद कोइरालाले सुन्दरबजारको मिलनचोकमा औषधी खाएर कार्यक्रमको औपचारिक शुरुवात गरेका छन् । यसैगरी जिल्ला स्वास्थ्य कार्यालयमा वेसीशहर नगरपालिका प्रमुख गुमान सिं अर्याल, प्रमुख जिल्ला अधिकारी वसन्तराज पुरी, प्रहरी नायव उपरीक्षक प्रकाश श्रीमल लगायत जिल्लाका विभिन्न कार्यालय प्रमुखहरुले औषधी खाएर कार्यक्रमको शुरुवात गरेका छन् ।
यसैगरी जिल्लाका अन्य पालिकाहरुमा पालिका प्रमुखहरुले प्रत्येक नगरपालिका र गाउँपालिकाका स्वास्थ्य शाखाको समन्वयमा औषधी खाएर औषधी खाने कार्यक्रमको शुरुवात गरेका छन् ।
जिल्लामा हात्तीपाईले रोग नियन्त्रणका लागि सन् २००९ देखि औषधी खुवाउने कार्यक्रम लागु भएको थियो तर केहि पालिकाहरुमा अझै पनि हात्तीपाईले रोगका विरामीहरु देखिएकोले यसपटक औषधी खुवाइएको हो ।
लमजुङमा यस बर्ष १४ चरणमा हात्तिपाइले रोग विरुद्धको औषधी खुवाउन लागिएको हो । फागुन ११ गतेदेखि सुरु हुने अभियान अन्तर्गत पहिलो दिन वडा तथा टोललमा स्वास्थ्य सस्था तथा बुथमार्फत हात्तिपाइले विरुद्धको औषधि खुवाइने भएको छ । सवै नागरिकले औषधि सेवन गरेमा रोग निवारण गर्न सकिने वताउदै स्वास्थ्य कार्यालयका निरिक्षक वरालले २ वर्ष मुनिका वालवालिका गर्भवती तथा सुत्केरी महिला र कडा रोगका विरामी वाहेक सवैले निर्धक्क भएर औषधि सेवन गर्न समेत आग्रह गरेका छन् ।
अभियान अन्तर्गत यसवर्ष दुई वर्ष मुनिका बालवालिका र गर्भवती महिला वाहेक जिल्लाका १ लाख ४६ हजार ७ सय ४२ जना लाई औषधि खुवाउने लक्ष्य रहेको स्वास्थ्य कार्यालयले जनाएको छ । औषधि खुवाउने अभियानमा जिल्लाभर ४ सय २८ स्वास्थ्यकर्मी र ६ सय ७० महिला सामुदायिक स्वास्थ्य स्वयंसेविका परिचालन भएका छन् ।
सबै पालिकाका स्वास्थ्य शाखाले आयोजना गरेको औषधी खुवाउने कार्यक्रममा हात्तीपाईले रोग निवारण गर्नको लागि सबैलाई औषधी खान आब्हान गरिएको छ ।
