लमजुङ । गण्डकी प्रदेशकै प्रतिष्ठित त्रिवेणी कप राष्ट्रब्यापी फुटबल प्रतियाेगिताकाे ३१ औं संस्करण अन्तर्गत शुक्रबार ३ खेल सम्पन्न भएका छन् ।
सहजी खेलमैदानमा भएको पहिलो खेलमा बेंसीसहर नगरपालिकाले दोर्दी गाउँपालिकालाई २–० गोल अन्तरले हराएको छ । बेंसीसहरको तर्फबाट धिरज तामाङले पहिलो हाफको ६ मिनेटमै गोल गरे । सन्दिप गिरीले दोस्रो हाफको ११ औं मिनेटमा गोल गरेर जितलाई सुनिश्चित बनाए ।
दोस्रो खेलमा सामना युवा क्लव तुरतुरेले काष्ठमण्डप रेष्टुरेन्ट एण्ड बार भुइँखेल फुटवल क्लव काठमाडौंलाई १–० गोलले पराजित गरेको छ । सामनाको तर्फबाट रोशन क्षेत्रीले पहिलो हाफको १७ औं मिनेटमा गरेको गोल नै निर्णायक बन्याे ।
तेस्रो तथा अन्तिम खेलमा ठाडाराई अधिकारी समाज दिहीथोकले पेन्गुइन एजुकेशन भरतपुर २४ लाई ३–१ गोलले हराएको छ । ठाडाराइको तर्फबाट सुनिल गोलेले पहिलो हाफको १५ औं मिनेटमा गोल गरे। पहिलो हाफकै २१ औं मिनेटमा गोलेले नै अर्काे गाेल थपे । ठाडाराइको तर्फबाट अनिल चौधरीले पहिलो हाफको ३२ औं मिनेटमा गोल गरी थप अग्रता दिए । पेन्गुइनका तर्फबाट मनिष गिरीले दोस्रो हाफको पहिलो मिनेटमै सान्त्वना गोल फर्काए । त्यसपछि पेन्गुइनका तर्फबाट गाेल फर्काउन सकेनन् ।
दोस्रो चरणमा प्रवेश गरेको बेंसीसहर नगरपालिका र बेंसीसहर युथ सोसाइटीबीच पुस १६ गते प्रतिष्पर्धा हुनेछ । समाना युवा क्लव तुरतुरे र लालीगुराँस युवा क्लब भुजुङबीच पुस १७ गते खेल हुनेछ । ठाडाराई अधिकारी समाज र लाङ्दीदेवी युवा क्लव नाल्माबीच पुस १७ गते नै खेल हुने आयोजक त्रिवेणी युवा क्लवका खेल संयोजक सिजन श्रेष्ठले जानकारी दिए ।
शनिबारको पहिलो खेल क्वीन गोर्खाज सिग्नल्स् फुटवल क्लव युके र अभिषेक चर्च रजहरबीच बिहान साँढे ९ बजे हुनेछ । दोस्रो खेल एलजी एसोसिएसन पोखरा र बाग्मती फुटवल क्लव सर्लाहीबीच दिउँसो साँढे १२ बजे हुनेछ । अन्तिम खेल विभागीय टीम त्रिभुवन आर्मी र नेपाल भानु युनाइटेडबीच साँढे २ बजे खेल हुने आयोजक त्रिवेणी युवा क्लवका सचिव प्रविन वाग्लेले बताए ।
शनिबार क्वीन गोर्खाज र विभागीय टीम नेपाली आर्मीको खेल हुने भएकाले खेल थप रोचक बन्ने र दर्शक पनि बढी आउने क्लवका अध्यक्ष राजकुमार घिमिरेले अपेक्षा गरेका छन् ।
बिगत तीन दशकदेखि लगातार फुटबल प्रतियाेगिता आयाेजना गर्दै आएकाे त्रिवेणी युवा क्लव बेसीशहरले यस बर्ष पुरस्कार राशीमा भारी बृद्धि गरेकाे छ । पाेखराकाे सहारा युथ क्लवले आयाेजना गर्ने आहा रारा गाेल्डकपकाे पहिलाे पुरस्कार १० लाख छ । त्रिवेणी युवा क्लवकाे आयाेजनामा बिहीबारबाट शुरू हुने प्रतियाेगितामा प्रथम पुरस्कारकाे राशी ८ लाख छ । याे राशी गण्डकी प्रदेशमै दाेस्राे ठुलाे धनराशीकाे पुरस्कार हाे ।
प्रतियाेगिताकाे उपविजेताले नगद ४ लाख र सेमीफाइनल पुग्ने दुई टीमले नगद १\१ लाख पुरस्कार पाउने छन् । सर्वोकृष्ट खेलाडी र सर्वाधिक गोलकर्ताले नगद २०\२० हजार पाउने छन् ।
मर्स्याङ्दीमा आठ कक्षासम्म स्थानीय पाठ्यपुस्तक
लमजुङ । लमजुङको मस्र्याङ्दी गाउँपालिकाले आधारभूत तहमा अध्यापनका लागि स्थानीय पाठ्यपुस्तक निर्माण गरेको छ । कक्षा १ देखि ८ सम्मका...
