लमजुङ । मर्स्याङ्दी गाउँपालिकाकाे वडा नम्वर ९ मा रहेको सरस्वती सदन आधारभुत विद्यालयले स्वर्ण महोत्सव मनाउन भब्य तयारी गरेकाे छ । विद्यालय स्थापना भएको ५० वर्ष पुरा भएको अवसरमा विबिध कार्यक्रम सहित स्वर्ण महोत्सव मनाउन लागिएको हो ।
विद्यालयले पुसकाे १८ देखि २२ गतेसम्म विबिध कार्यक्रम गरी स्वर्ण महोत्सव मनाउन लागिएको प्रधानाध्यापक रामचन्द्र घिमिरेले जानकारी दिए ।
घिमिरेका अनुसार पुस १८ गते मर्स्याङ्दी गाउँपालिका अन्तर्गतका विद्यालयस्तरीय विबिध कार्यक्रम एवं प्रतियोगिता हुने भएको छ । स्वर्ण महोत्सवको औपचारिक उद्घाटन भने विशेष समारोहका विच पुस २० गते हुनेछ । त्यसैगरी विद्यालयमा लोक गित प्रतियोगिता, बाजा प्रस्तुती, आमा समुह नृत्य प्रतियोगिता सँगै राष्ट्रिय एवं स्थानीय कलाकारहरुको विशेष प्रस्तुती रहने विद्यालयले जनाएको छ ।
विद्यालयले महोत्सवबाट विद्यालय र समुदाय विच सुमधुर सम्बन्ध कायम गराउने, बालमैत्री र प्रविधिमैत्री सिकाईमा जोड दिँदै सिकाई उपलब्धि वृद्धि गराउने, अभिभावकको माग अनुसार प्राथमिक तहसम्म अंग्रेजी भाषामा पठनपाठन गराउने लगायतका लक्ष्य राखेको छ ।
त्यसैगरी लगनशील, सक्षम र अनुशासित विद्यार्थी उत्पादनमा जोड दिने, कम उमेरका वालवालिको लागि प्ले ग्रुप कक्षा व्यवस्थापन गर्ने लगायतका लक्ष्य राखिएको विद्यालयले जनाएको छ ।
स्थापनाकालदेखि हालसम्म विद्यालयमा विभिन्न तवरबाट योगदान गर्ने संस्थापक जग्गादाता, चन्दादाता, अक्षयकोषदाता, आजिवन सदस्य लगाएत सहयोगी दाताहरुलाई सम्मान गर्ने कार्यक्रम रहेको विद्यालय ब्यवस्थापन समितिका अध्यक्ष एवं संवरण महाेत्सव मुल समाराेह समितिका संयाेजक रामबहादुर परियारले जानकारी दिए ।
गुणस्तरीय शिक्षाको विकाससंगै विद्यालयको सुविधा सम्पन्न भौतिक संरचना निर्माण गर्दै समय अनुकुल प्रविधिमैत्री र गुणस्तरीय शिक्षा प्रदान गर्ने, सुरक्षित र वालमैत्री पठनपाठन क्रियाकलापमा जोड दिँदै मर्स्याङ्दी गाउँपालिकाकै नमुना विद्यालयको रुपमा स्थापना गर्ने लक्ष्य विद्यालयले राखेको छ ।
स्वर्ण महोत्सवलाई सफल बनाउन विद्यालय व्यवस्थापन समितिका अध्यक्ष रामबहादुर परियारको संयोजकत्वमा मुल समारोह समिति र विभिन्न १२ वटा उपसमिति गठन भएको छ ।
गत शुक्रबार बेंसीसहरमा पत्रकार सम्मेलन गरि संवरण महाेत्सवबारे जानकारी दिईएकाे थियाे । साे अबसरमा वडाअध्यक्ष हरिशचन्द्र थापा, कार्यपालिका सदस्य मधुमाया बगाले, विद्यालय व्यवस्थापन समितिका पुर्व अध्यक्ष एवं प्रचार प्रसार उपसमिति संयोजक रामबहादुर थापा, पुर्व अध्यक्ष एंव आर्थिक उपसमितिका संयाेजक सुवेदार नन्दराज भण्डारी, मञ्च ब्यवस्थापन उपसमिति संयाेजक रणबहादुर भण्डारीलगायत विभिन्न उपसमिति संयोजकहरुको विशेष उपस्थिती रहेको थियो ।
