दोर्दी । दोर्दी ८ खिन्चोक बेसीमा एक दिने निःशुल्क स्वास्थ्य शिविर सम्पन्न भएको छ । लमजुङ अस्पताल र तमु कल्याण युवा क्लवको संयुक्त आयोजनामा भएको उक्त शिविर कार्यक्रमको नेकपा माओवादी केन्द्रका महासचिव देवप्रसाद गुरुङले उद्घाटन गरेका थिए ।
नेता गुरुङले शिविरको उद्घाटन गर्दै रोग लागेर उपचारमा धाईरहनु भन्दा रोग लाग्न नदिन व्यक्तिगत सरसफाईका विधि अपनाउनको लागि विद्यालय तथा व्यक्तिगत स्वास्थ्य कार्यक्रम सञ्चालन गर्नुपर्ने बताए । माओबादी नेता गुरुङले स्वास्थ्य क्षेत्र मात्र नभई शिक्षा, खेलकुद र समग्र विकासका लागि नेकपा माओवादीले ध्यान दिइरहेको बताए । नेता गुरुङले आफू व्यक्तिगत रुपमा पनि यस्ता विषयमा सक्दो सहयोग गर्ने प्रतिवद्धता व्यक्त गरेका थिए ।
शिविरमा फिजिसियन डा.कुम बहादुर गुरुङ, मेडिकल अफिर डा.अमुल्य सोति, मेडिकल अधिकृत डा. विजय धिताल, ल्याव सहायक कुमार बाबु तिवारी, फार्मेसी सहायक सुजन गुरुङ, डेण्टल हाईजेनिस्ट पुजा रेग्मीुुु, डेण्डल सर्जन डा.रिविका श्रेष्ठ, स्टार्फ नर्स शुसिला गुरुङ, मेरिनन गुरुङ, करुना चिलुवाल, हेल्थ एसिस्टेन्ट देवचन्द्र गुरुङ, फोकल पर्सन अमृत चिलुवाल लगायतका चिकित्सहरुबाट निःशुल्क स्वास्थ्य सेवा दिइएको अस्पतालले जनाएको छ ।
शिविरमा २ सय ७४ जनाले सेवा लिएका थिए । जसमध्ये महिला १ सय २९ जना, पुरुष ८५ जनाले जेष्ठ नागरिकहरुले सेवा पाएको बताइएको छ । स्वास्थ्य सेवा अन्तर्गत आँखा जाँच ८७ जना, ल्याब परीक्षणमा ९३ जना, दन्त परीक्षणमा २८ जनाले सेवा लिएको लमजुङ अस्पतालका मेडिकल सुपरिडेन्ट डा. रमेश प्रसाद आचार्यले बताए ।
शिविरमा संविधान सभा सदस्य लाल बहादुर गुरुङ, लमजुङ अस्पताल व्यवस्थापन समितिका अध्यक्ष हरिजंग तामाङ, सदस्य बासु थापा, अनुसन्धान विभाग प्रमुख नरेश शाह, दोर्दी ८ का वडा अध्यक्ष नारायण घले, वडा नं. ९ का वडा अध्यक्ष आशिष तामाङ लगायतको उपस्थिति रहेको थियो ।
यसप्रकारको निःशुल्क स्वास्थ्य सेवा प्राप्त भएसंगै स्थानीयले अस्पतालप्रति धन्यवाद ज्ञापन गरेका थिए । आगामी दिनमा अझ प्रभावकारी यस्ता शिविर गाउँठाउँमा ल्याउन समेत आग्रह गरेका छन् ।
