मंसिर ४ गते हुने प्रतिनिधि तथा प्रदेश सभा निर्वाचनको समाचार संकलनमा सहजता अपनाउन मिडिया सेन्टर स्थापना गरिने भएको छ ।
जिल्लाका क्रियाशिल पत्रकारहरुसँग भएको निर्वाचन आचार संहिता र विविध विषयको छलफलमा मिडिया सेन्टर स्थापना गर्ने सहमति भएको हो ।
मुख्य निर्वाचन अधिकृत शिव प्रसाद खनालको अध्यक्षतामा पत्रकारहरु सहित भएको बैठकमा निर्वाचन आचार संहिता पालना गर्ने गराउने सम्बन्धमा सबै पक्षबाट आआफ्नो भूमिका निर्वाह गर्ने, निर्वाचनसँग सम्बन्धित सूचना सम्प्रेषणलाई सहज बनाउन मुख्य निर्वाचन अधिकृतको कार्यालयसँगै मिडिया सेन्टरको स्थापना गर्ने र निर्वाचन आचार संहिताको विषयमा सञ्चारकर्मीहरुसँग फेरी छलफल र अन्तरक्रिया गर्ने निर्णय भएको छ ।
बैठकमा प्रमुख जिल्ला अधिकारी शुशिल बैद्य, चण्डी प्रसाद गणका प्रमुख सेनानी मनोज कार्की, प्रहरी नायव उपरिक्षक प्रकाश श्रीमल, प्रमुख अनुसन्धान अधिकृत कुमार बुढाथोकी, नेपाल पत्रकार महासंघ लमजुङ शाखाका अध्यक्ष परमेश्वर अधिकारी लगायत जिल्लाका क्रियाशिल पत्रकारहरुको उपस्थिति रहेको थियो ।
