मनाङ सदरमुकाम चामे जोड्ने एकमात्र बेंसीसहर–चामे सडक बाढीपहिरोले क्षतविक्षत बनाएको छ ।
लगातार परिरहेको बर्षाले बेसीसहर–चामे सडक अन्र्तगत बेसीसहर नगरपालिका–६ खरखरे र दलदलेमा करिब एक किलोमिटर सडकमा पहिरो गएको छ । सो क्षेत्रमा भासिएको सडक मर्मत र आएको पहिरो हटाउन नसक्दा गत जेठ महिनादेखि सडक अबरुद्ध छ ।
लमजुङ सदरमुकाम बेंसीसहर हुँदै मनाङ सदरमुकाम चामे जोड्ने एकमात्र यो सडक अबरुद्ध हुँदा सिङ्गो मस्र्याङ्दी गाउँपालिका र मनाङबासी समस्यामा परेका बेसीसहर चामे सडक सरोकार समितिका संयोजक सूर्यप्रकाश कतिलाले बताए ।
वर्षाका कारण विभिन्न स्थानमा सडक बगाउनुका साथै पहिरोले सडक पुरेको छ । पहिरोले सडकसँगै स्थानीयको खेतीयोग्य जमिन पनि बगाएको छ । सोही सडक अन्र्तगत मस्र्याङ्दी गाउँपालिका–९, सिम्पानी सिम्ले नजिकै करिब एकसय मिटर लम्बाई सडक भासिएको छ ।
सो सडक भासिएर पहिरो गएमा खुदीबजार वारपार गर्ने झोलुङ्गे पुलमा समेत क्षेति पुग्नेछ । सडक भासिएपछि सवारीसाधन चल्न सकेका छैनन् भने स्थानीय जोखिम मोलेर हिँडडुल गरेका छन् ।
मस्र्याङ्दी गाउँपालिकाका अध्यक्ष अर्जुन गुरुङले मौसमका कारण सडक खुलाउन समस्या भएको बताए । भौगोलिक अबस्थाको अबलोकन गरि सडक डिभिजन कार्यालयलाई सडक खुलाउन अनुरोध गरिएको उनले बताए ।
डुम्रे बेसीसहर चामे सडक परियोजनाका प्रमुख अच्युतविलास पन्तले अबरुद्ध सडक खुलाउन पटक पटक प्रयास गरिएपनि सफल हुन नसकेको बताए । लगातार पानी परिरहेको र पहिरो जान नरोकिएकाले सडक खुलाउन कठिन भएको उनले बताए ।
मुख्य सडक अबरुद्ध भएपछि ठुला सवारी साधन चल्न सकेका छैनन भने साना सवारी साधन बेसीसहरदेखि बाझाखेत, लेते, सिमलचौर हुँदै भुलभुले निस्कने बैकल्पिक बाटो हिँडेका छन् ।
