लमजुङ । विश्व शान्तिको कामना गर्दै लमजुङमा शनिबार भएको खुला म्याराथन प्रतियोगितामा कुलबहादुर बस्नेत प्रथम हुनुभएको छ। दोलखा निवासी बस्नेत नेपाली सेनाको भैरवनाथ गणमा कार्यरत हुनुहुन्छ। उहाँले २६ किलोमिटर दुरी दुई घण्टा १६ मिनेटमा पार गर्दै प्रथम हुनुभएको हो।
तनहुँको भानु नगरपालिका–१२, मानेचौकाका आदित्य जिसीले दुई घण्टा १८ मिनेटमा पार गर्दै द्वितिय हुनुभएको आयोजक लमजुङ जेसीस–२०२५ का अध्यक्ष प्रतिजंग तामाङले जानकारी दिनुभयो। तामाङका अनुसार बेसीसहर नगरपालिका–१० पिसहिलदेखि सुरु भएको म्याराथन मस्र्याङ्दी गाउँपालिका हुँदै गाउँ सहर दरबारसम्म पुगेर टुङ्गिएको थियो।
प्रतियोगितामा प्रथमलाई नगद ३० हजार र द्वितियलाई नगद पन्ध्र हजारको साथमा मेडल र प्रमाणपत्र पुरस्कार दिइएको छ। ३५ धावक सहभागी प्रतियोगितामा सान्त्वना हुनुहुने गौतम श्रेष्ठ, रामजी बस्नेत, श्रीलाल तामाङ, अनिल गुरुङ, अनुज गुरुङ, प्रकाश तामाङ मीनरासी विक र तिलक कुइँकेललाई नगद एक हजार रुपियाँ दिइएको म्याराथन संयोजक तुल्सी गुरुङले जानकारी दिनुभयो।
धावक पिसहिलदेखि भुष्मे, हात्तिरुख, जलकिने, खुदी, सिम्पानी, बेसीसहर हुँदै गाउँ सहर दरबार पुगेका थिए। यो प्रतियोगिताले पिसहिलको द्वन्द्वकालीन र गाउँ सहर दरबारको ऐतिहासिक पक्षको उजागर गर्न सहयोग पुगेको जेसीस–२०२५ को कार्यकारिणी उपाध्यक्ष खुसीमाया गुरुङले बताउनुभयो।
धार्मिक तथा पर्यटकीय सौन्दर्यले भरिपूर्ण पिसहिल र गाउँसहर दरबारलाई म्याराथनका माध्यमले देश विदेशमा चिनाउन प्रतियोगिताको आयोजना गरिएको जेसीस लमजुङका निर्देशक रोशन खतिवडाले बताउनुभयो।
