लमजुङ । नेपाल सरकारका सञ्चारमन्त्री एवं नेकपा एमालेका उपमहासचिव पृथ्वीसुब्बा गुरुङको गृहजिल्ला लमजुङ आएर पूर्व उपप्रधानमन्त्री एवं मातृभूमि जागरण अभियान नेपालका संयोजक डा. भीम रावलले विपरित सिद्धान्त भएका दुई ठूला पार्टीहरुको सहयात्रा गन्तव्यबिहीन र घातक भएको बताउनुभएको छ । सदरमुकाम बेसीशहरमा शुक्रवार आयोजित एक कार्यक्रममा बोल्दै नेता रावलले यस्तो बताउनुभएको हो ।
मातृभूमि जागरण अभियान नेपालद्वारा आयोजित जागरण भेलामा बोल्दै नेता रावलले लोकतान्त्रिक समाजवादको सिद्धान्तमा चल्ने नेपाली कांग्रेस र जनताको बहुदलीय जनवादमा चल्ने नेकपा एमालेको सत्ता साझेदारी गन्तव्यविहीन र लक्ष्यविहीन भएको आरोप लगाउनुभयो । कांग्रेस र एमालेको सत्ता साझेदारी सहयात्रा सत्ता स्वार्थका लागि मात्रै भएकोले देशका लागि घातक हुने नेता रावलको भनाइ थियो ।
नेता रावलले अहिले मुलुक राजनीतिक र आर्थिक रुपमा सङ्कटोन्मुखभएको भन्दै राष्ट्र र राष्ट्रियताको निम्ति स्वभीमानी नेपालीहरु एक हुनुपर्नेमा जोड दिनुभयो । राष्ट्र र राष्ट्रियताको पक्षमा उभिँदा पार्टीभित्रै आलोचित हुँदै निस्कासितसमेत हुनुपरेको उहाँले गुनासो गर्नुभयो । राजनीतिक पार्टीहरूमा नै लोकतन्त्र सङ्कटमा परेको नेता रावलको आशय थियो ।
कार्यक्रमका संयोजक डा. बालकृष्ण बरालले वर्तमान राजनीतिक घटनाक्रमले मुलुकमा गम्भीर सङ्कट ल्याउन सक्ने भन्दै राष्ट्रिय सङ्कट टार्नका लागि आमनागरिक सचेत हुनुपर्ने बेला आएको बताउनुभयो । कार्यक्रममा सन्तु विक, सूर्यबहादुर कुँवरलगायतले सम्बोधन गर्नुभएको अभियानका सदस्य वेनबहादुर सुयलले जानकारी दिनुभयो । कार्यक्रममा विभिन्न राजनीतिक दलमा आवद्ध एवं स्वतन्त्र नागरिकहरुको सहभागिता रहेको थियो ।
